ەلىمىزدىڭ باس سانيتار دارىگەرى ەرلان قياسوۆ پرەمەر-مينيستردىڭ ورىنباسارى ەرالى توعجانوۆ باستاعان دەلەگاسيا قۇرامىمەن سقو، پاۆلودار جانە اقمولا وبلىستارىندا بولدى.

جۇمىس ساپارى بارىسىندا ايماقتارداعى مەديسينالىق مەكەمەلەردىڭ كوروناۆيرۋس ينفەكسياسىنىڭ ەكىنشى تولقىنىنا دايىندىعى تەكسەرىلدى. سونداي-اق ەپيدەميولوگيالىق احۋال بويىنشا كەزدەسۋلەر وتكىزىلىپ، جاعدايدى تۇراقتاندىرۋ بويىنشا قابىلدانعان شارالار تۋرالى ەسەپتەر تىڭدالدى.

سونىمەن قاتار، پاۆلودار وبلىسىندا قازان ايىنىڭ سوڭىندا COVID-19 اۋرۋىنىڭ ءۇش ەسە ءوسۋى تىركەلدى. اسىرەسە، پاۆلودار، ەكىباستۇز جانە اقسۋ قالالارىندا ىندەتتىڭ تارالۋى ورشىگەن. اقمولا وبلىسىندا تىركەلگەن كوروناۆيرۋس ينفەكسياسىنىڭ سانى ءۇش ەسەگە ارتتى. وسىعان بايلانىستى 9 قاراشادان باستاپ ايماقتاردا كارانتين جانە شەكتەۋ شارالارى كۇشەيتىلەدى.

دەنساۋلىق ساقتاۋ ۆيسە-مينيسترى ە.قياسوۆ اقمولا وبلىسى سانيتارلىق-ەپيدەميولوگيالىق باقىلاۋ كوميتەتىنىڭ قىزمەتكەرلەرىمەن، سونداي-اق ۇلتتىق ساراپتاما ورتالىعى وبلىستىق فيليالىنىڭ باسشىسىمەن كەزدەسۋلەر وتكىزىپ، ونىڭ بارىسىندا ازاماتتار مەن كاسىپكەرلىك سۋبەكتىلەرىنىڭ سانيتارلىق-ەپيدەميولوگيالىق تالاپتاردى ساقتاۋ قاجەتتىلىگى تۋرالى ەسكە سالدى. سونىمەن بىرگە، پتر ادىسىمەن COVID-19 ينفەكسياسىن انىقتاۋ باعىتىندا زەرتحانالىق تەكسەرۋلەر سانىن كوبەيتۋدىڭ ماڭىزدىلىعىنا توقتالدى.