ق ر پرەمەر-مينيسترى ا. مامين COVID-19 جونىندەگى ۆاك وتىرىسىن وتكىزدى

پرەمەر-مينيستر اسقار مامين ق ر اۋماعىندا كوروناۆيرۋس ينفەكسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ (ۆاك) سەلەكتورلىق وتىرىسىن وتكىزدى.

"ەرتە ۆاكسيناسيالاۋ، جاپپاي ماسكا تاعۋ رەجيمىن جانە ارا قاشىقتىقتى ساقتاۋ شارالارىنىڭ ارقاسىندا بيىل كۇزدە حالىقتىڭ پنيەۆمونيامەن جانە جرۆي-مەن سىرقاتتانۋشىلىعى تۇراقتى تومەندەۋ ديناميكاسىنا يە. مىسالى، تەك قازان ايىندا وسى جىلدىڭ قىركۇيەك ايىمەن سالىستىرعاندا، پنيەۆمونيامەن اۋىرعاندار سانى 26%-عا، 24،8 مىڭنان 18،3 مىڭعا دەيىن ازايدى، ال ءجىتى رەسپيراتورلىق ۆيرۋستىق ينفەكسيامەن اۋىرعاندار 7،6%-عا، 286،8 مىڭنان 265،3 مىڭ ادامعا دەيىن ازايعان. وتكەن جىلمەن سالىستىرعاندا جرۆي-مەن اۋىرۋ 1،7 ەسە – 2019 جىلعى قازانداعى 441،2 مىڭنان بيىل قازاندا 265،3 مىڭعا دەيىن تومەندەدى" دەلىنگەن وتىرىس بارىسى تۋرالى اقپاراتتىق حابارلامادا.

سونىمەن قاتار بارلىق وڭىردە COVID-19-بەن اۋىرۋ جاعدايلارىنىڭ ارتقانى بايقالىپ وتىرعانى حابارلاندى.

ۆيرۋستىڭ رەپرودۋكتيۆتىك يندەكسى رەسپۋبليكا بويىنشا – 1،2، ينفەكسيالىق توسەك ورىندارىنىڭ تولتىرىلۋى 21%، رەانيماسيالىق توسەك ورىندارىنىڭ جۇكتەمەلىگى 17% قۇرايدى. شىعىس قازاقستان جانە پاۆلودار وبلىستارى – قىزىل ايماقتا، باتىس قازاقستان، قوستاناي، اقمولا جانە سولتۇستىك قازاقستان وبلىستارى – سارى ايماقتا.

پرەمەر-مينيستر قىزىل جانە سارى ايماقتارداعى وڭىرلەردىڭ اكىمدەرىنە جاعدايدى تۇراقتاندىرۋ بويىنشا قوسىمشا شارالار قابىلداپ، ماسەلەنى ەرەكشە باقىلاۋدا ۇستاۋدى تاپسىردى.

دەنساۋلىق ساقتاۋ مينيسترلىگىنە:

♦بارلىق مەديسينالىق قىزمەتتەردىڭ ورتالىق جانە وڭىرلىك دەڭگەيدە سىرقاتتانۋشىلىقتىڭ ىقتيمال ءوسۋ جاعدايىنا تولىق دايىندىعىن قامتاماسىز ەتۋ؛

♦ حالىقپەن شەكتەۋ شارالارىن ساقتاۋ جونىندە ءتۇسىندىرۋ جۇمىستارىن تۇراقتى نەگىزدە جۇرگىزۋ؛

♦شەكارا قىزمەتىمەن، وڭىرلەردىڭ اكىمدىكتەرىمەن بىرلەسىپ، شەتەلدىكتەرگە قازاقستانعا كىرۋ ءۇشىن بەرىلەتىن دەنساۋلىق ساقتاۋ ۇيىمدارىنىڭ شاقىرۋ قۇجاتتارىنا باقىلاۋدى كۇشەيتۋ؛

♦ادىلەت مينيسترلىگىمەن، اكىمدىكتەرمەن بىرلەسىپ، ق ر اۋماعىندا ەمدەلۋ ءۇشىن شەتەل ازاماتتارىنا شاقىرۋ بەرۋگە ۋاكىلەتتى، وڭىرلەردەگى دەنساۋلىق ساقتاۋ ۇيىمدارىنىڭ تىزبەسىن ايقىنداۋ تاپسىرىلدى.

ىشكى ىستەر مينيسترلىگىنە حالىق پەن بيزنەس سۋبەكتىلەرىنىڭ شەكتەۋ جانە كارانتين شارالارىن ساقتاۋىن باقىلاۋ جونىندەگى مونيتورينگتىك توپتاردىڭ جۇمىسىن كۇشەيتۋ تاپسىرىلدى (بيىلعى 17 تامىزدان باستاپ ەلىمىزدە 41 مىڭ رەيدتىك تەكسەرۋ جۇرگىزىلدى، 8،7 مىڭ كارانتيندى بۇزۋ فاكتىسى انىقتالدى).