9 قاراشا كۇنى رەسەيدىڭ مي-24 اسكەري تىكۇشاعى ارمەنيادا ەراسح ەلدى مەكەنىنىڭ جانىندا اپاتقا ۇشىرادى. وعان تاسىمالداناتىن زەنيتتىك زىمىران كەشەنىنەن وق اتىلعان. سالدارىنان تىكۇشاق قۇلاپ، ەكيپاجدىڭ ەكى مۇشەسى قازا تاپتى، بىرەۋى ورتاشا اۋىر جاراقاتپەن ەۆاكۋاسيالاندى. بۇل تۋرالى ريا نوۆوستي سايتى حابارلادى.
تىكۇشاق ارمەنيا اۋماعىنداعى رەسەي 102ء-شى اسكەري بازاسىنىڭ اۆتوتىزبەگىنە جول باستاپ بارا جاتقان.
رەسەي قورعانىس مينيسترلىگىنىڭ رەسمي وكىلى، گەنەرال-مايور يگور كوناشەنكوۆتىڭ ايتۋىنشا، مي-24 ارمەنيا ماڭىنداعى اۋە كەڭىستىگىندە ۇرىس ايماعىنان تىس جەردە اتىلعان.
جەلىدە تىكۇشاق سىنىقتارىنىڭ العاشقى سۋرەتتەرى، سونداي-اق قۇلاعان ساتتە تۇسىرىلگەن بەينەجازبالار پايدا بولدى. سۋرەتتى ارمەنيا توتەنشە جاعدايلار مينيسترلىگىنىڭ باسپا ءسوز قىزمەتى تاراتتى.
ازەربايجان سىرتقى ىستەر مينيسترلىگى ازەربايجان اسكەرى رەسەيلىك تىكۇشاقتى اتىپ تۇسىرگەنىن مويىنداپ، وقيعانىڭ كەزدەيسوق بولعانىن حابارلادى. باكۋ وقيعا ءۇشىن كەشىرىم سۇراپ، رەسەيگە وتەماقى تولەۋگە دايىن ەكەنىن مالىمدەدى.
"ازەربايجان تاراپى كەزدەيسوق سيپاتتاعى جانە رەسەي تاراپىنا قارسى باعىتتالماعان وسى قايعىلى وقيعاعا بايلانىستى رەسەي تاراپىنان كەشىرىم سۇرايدى.
ازەربايجان تاراپى قازا تاپقان ەكيپاج مۇشەلەرىنىڭ وتباسىلارىنا شىن جۇرەكتەن كوڭىل ايتادى، سونىمەن قاتار زارداپ شەككەندەردىڭ تەزىرەك ساۋىعىپ كەتۋىن تىلەيدى.
ءازىربايجان تاراپى ءتيىستى وتەماقى تولەۋگە دايىن ەكەنىن مالىمدەيدى" دەلىنگەن ءسىم حابارلاماسىندا.
