پرەزيدەنت قاسىم-جومارت توقايەۆ قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعانۇلىن قابىلدادى، دەپ حابارلادى اقوردا سايتى.

باس ءمۇفتي مەملەكەت باسشىسىنا قازاقستان مۇسىلماندارى ءدىني باسقارماسىنىڭ پاندەميا كەزىندە جاساعان قايىرىمدىلىق شارالارى جايىندا مالىمەت بەردى.

"ناۋرىزباي قاجى تاعان ۇلى ىندەت كەزىندە ءمۇفتيات تاراپىنان اۋرۋحانالارعا جاساندى تىنىس الۋ، وتتەگى اپپاراتتارى مەن مەديسينالىق قۇرال-جابدىقتار، مۇقتاج جاندارعا دارى-دارمەكتەر، مەشىتتەردىڭ جانىنداعى تىگىن سەحتارىندا تىگىلگەن بەتپەردەلەر مەن قورعانىس كيىمدەرىنىڭ تەگىن تاراتىلعانىن اتاپ ءوتتى. سونىمەن قاتار "ەل ۇلەسى – پاتەردە" اكسياسى اياسىندا 314 باسپانا بەرىلگەنىن ايتتى. بۇدان بولەك يمامداردىڭ ءبىلىمىن كوتەرۋ، كادر دايارلاۋ ماسەلەلەرى جايىندا باياندادى.

ناۋرىزباي قاجى تاعان ۇلى قاسىم-جومارت توقايەۆقا ءمۇفتيات الداعى ۋاقىتتا "يحسان" ءىلىمىن، ابايدىڭ كەمەل ادام كونسەپسياسىن كەڭىنەن دارىپتەپ، ناسيحاتتاۋ جۇمىستارىمەن اينالىساتىنىن جەتكىزدى" دەلىنگەن حابارلامادا.

كەزدەسۋ بارىسىندا قازاقستان مۇسىلماندارى ءدىني باسقارماسىنىڭ الداعى جوسپارلارى تۋرالى دا ءسوز بولدى. اتاپ ايتقاندا، يسلام اكادەمياسىن قۇرۋ، يسلام جانە تەولوگيا كىتاپحاناسىن سالۋ، ەلىمىزدەگى مەشىتتەردىڭ ارحيتەكتۋراسىن قازاقى سالت-ساناعا ساي قالىپتاستىرۋ ماسەلەلەرى ايتىلدى.

كەزدەسۋ سوڭىندا پرەزيدەنت قاسىم-جومارت توقايەۆ ءدىني باسقارمانىڭ جۇمىسىن جوعارى باعالاپ، الداعى باستامالارىنا ساتتىلىك تىلەدى.