الماتىدا ءال-فارابي اتىنداعى قازاق ۇلتتىق ۋنيۆەرسيتەتىندە ق ر مەملەكەتتىك حاتشىسى، ءابۋ ناسىر ءال-فارابيدىڭ 1150 جىلدىعىن دايىنداۋ جانە وتكىزۋ جونىندەگى مەملەكەتتىك كوميسسيانىڭ ءتوراعاسى قىرىمبەك كوشەربايەۆتىڭ قاتىسۋىمەن بىرنەشە ءىس-شارا ءوتتى.

شاراعا ءبىلىم جانە عىلىم ءمينيسترى اسحات ايماعامبەتوۆ، مادەنيەت جانە سپورت ءمينيسترى اقتوتى رايىمقۇلوۆا، قازۇۋ رەكتورى عالىم مۇتانوۆ، اكادەميالىق قوعامداستىق پەن ب ا ق وكىلدەرى، ۋنيۆەرسيتەت وقىتۋشىلارى مەن ستۋدەنتتەرى قاتىستى.

كەزدەسۋ اياسىندا الەمدە تۇڭعىش رەت جارىق كورگەن «ءال-فارابي» ەنسيكلوپەدياسىنىڭ تۇساۋكەسەرى ءوتتى. ەنسيكلوپەديانىڭ مازمۇنى تاريحي دەرەكتەر، مالىمەتتەر، گەوگرافيالىق نىساندار، ءومىرباياندىق مالىمەتتەر، ويشىلدىڭ ءومىر جولى مەن عىلىمي مۇرالارىن (تراكتاتتارى مەن ولارعا تۇسىندىرمەلەر)، ۇعىمدار مەن تەرميندەر، اراب-مۇسىلمان رەنەسسانس كەزەڭىندەگى بەلگىلى عالىمداردىڭ ەڭبەكتەرىن قامتيدى.

وندا زاماناۋي زەرتتەۋشىلەر مەن قازاقستاندىق فارابيتانۋشىلار، سونداي-اق، يسلام فيلوسوفياسى، ءدىن، مادەنيەت، عىلىم جانە ءبىلىم ماسەلەلەرىمەن اينالىساتىن بارشا عالىمدار تۋرالى بيبليوگرافيالىق مالىمەتتەر كەلتىرىلگەن.

«بۇل - قازاق تىلىندەگى بىرەگەي ەنسيكلوپەديا. مۇندا عىلىمي وزەكتى ماتەريالدار، بيىل جوسپارلانعان شارالار، بۇگىنگى شاراعا قاتىستى ماتەريالدار توپتاستىرىلعان. ەنسيكلوپەديا ادامنىڭ ءبىلىم كوكجيەگىن كەڭەيتەدى. بۇل ەڭبەك ودان ارى دا تولىقتىرىلا بەرەدى. ءبىرىنشى كەزەكتە جاستارىمىزدىڭ گۋمانيزم قاعيداتتارىنا نەگىزدەلگەن فارابي مۇراسىن جەتە تۇسىنگەنى كەرەك. جاستارعا قولجەتىمدى بولۋى ءۇشىن ءبىز بۇل ەڭبەكتەردى ورىس جانە اعىلشىن تىلدەرىنە اۋدارماقپىز»، - دەدى ءال-فارابي ورتالىعىنىڭ ديرەكتورى بەكجان مەيىربايەۆ.

دوڭگەلەك ۇستەل بارىسىندا قىرىمبەك كوشەربايەۆ قازاقستاندىق فارابيتانۋشىلارعا پاندەمياعا قاراماستان سىڭىرگەن ەڭبەگى ءۇشىن العىسىن ايتتى.