الماتىدا «ۇلى دالانىڭ ۇلتارالىق ءتىلى» تاقىرىبىندا ءى رەسپۋبليكالىق كونگرەسس ءوتتى.

ءىس-شاراعا قازاقستان حالقى اسسامبلەياسى ءتوراعاسىنىڭ ورىنباسارى – حاتشىلىق مەڭگەرۋشىسى جانسەيىت تۇيمەبايەۆ، ق ر اقپارات جانە قوعامدىق دامۋ ۆيسە-مينيسترى مارات ءازىلحانوۆ، فيلولوگيا مەن لينگۆيستيكا سالاسىنىڭ ساراپشىلارى، قوعام قايراتكەرلەرى، ءتىل جاناشىرلارى، اسسامبلەيا مۇشەلەرى، ەتنومادەني جانە جاستار بىرلەستىكتەرىنىڭ وكىلدەرى قاتىستى.

«بۇگىن «ۇلى دالانىڭ ۇلتارالىق ءتىلى» فورۋمى اياسىن كەڭەيتىپ، ءبىرىنشى رەسپۋبليكالىق ءتىل كونگرەسىن وتكىزىپ وتىرمىز. جيىندى قازاقستاننىڭ تۇڭعىش پرەزيدەنتى – ەلباسى، قازاقستان حالقى اسسامبلەياسىنىڭ ءتوراعاسى نۇرسۇلتان نازاربايەۆتىڭ «قازاق ءتىلى بارشانى بىرىكتىرەتىن، جاستاردى جاقىنداستىراتىن تاتۋلىق تىلىنە اينالۋعا ءتيىس» دەگەن سوزىمەن باستاعىم كەلىپ وتىر. مەملەكەتىمىزدە ءومىر ءسۇرىپ جاتقان بارلىق ۇلتتىڭ قازاق ءتىلىن – مەملەكەتتىك ءتىل ەسەبىندە، ۇلتارالىق ءتىل ەسەبىندە قولداناتىن كەزى جەتتى. پرەزيدەنتىمىز قاسىم-جومارت كەمەل ۇلى توقايەۆ قازاقستان حالقىنا جولداۋىندا «قازاق ءتىلى تاياۋ كەلەشەكتە ۇلتارالىق ءتىل رەتىندە قىزمەت اتقارۋى قاجەت» دەگەن ءسوزى بار. مىنە وسى جۇمىستاردىڭ جۇزەگە اسا باستاعانىن كورسەتۋ ماقساتىندا وسىنداي كونگرەستى ۇيىمداستىرىپ وتىرمىز»،– دەدى جانسەيىت تۇيمەبايەۆ.

ءوز كەزەگىندە، ق ر اقپارات جانە قوعامدىق دامۋ ۆيسە-مينيسترى مارات ءازىلحانوۆ مينيسترلىك ەلىمىزدەگى ەتنومادەني بىرلەستىكتەرمەن قاشاندا تىعىز بايلانىس ورناتۋعا مۇددەلى ەكەنىن اتاپ ءوتتى.

«بۇل ماقساتتا باعىتىمىز – ايقىن، جوسپارىمىز – بەلگىلى. اتاپ ايتقاندا، ەلىمىزدە 2014 جىلدان بەرى ەتنومادەني بىرلەستىكتەر جانىندا مەملەكەتتىك ءتىل مەن ءار ەتنوستىڭ ءوز انا ءتىلىن وقىتۋ كۋرستارى ۇيىمداستىرىلىپ كەلەدى. بۇگىنگى كۇنگە دەيىن وسىنداي وقىتۋ كۋرستارىنان 81% ەتنوس وكىلى وقۋدان ءوتىپتى. جالپى، 2011 جىلدان باستاپ مەملەكەتتىك ءتىل وقىتۋ ورتالىقتارىندا جارتى ميلليوننان استام ەل ازاماتتارى (513 624) قازاق ءتىلى كۋرستارىن وقىپ شىققان»،– دەدى ول.

سونىمەن قاتار، مارات ءازىلحانوۆ مەملەكەت باسشىسىنىڭ تاپسىرماسى نەگىزىندە ءتىل ساياساتىن ىسكە اسىرۋدىڭ 2020-2025 جىلدارعا ارنالعان مەملەكەتتىك باعدارلاماسى بەكىتىلگەنىن تىلگە تيەك ەتتى.

«رۋحاني جاڭعىرۋ» باعدارلاماسى اياسىندا قازاق ءتىلىن لاتىن گرافيكاسىنا كەزەڭ-كەزەڭىمەن كوشىرۋ جۇمىستارى جۇيەلى جۇرگىزىلىپ كەلەدى. قازاق ءتىلىنىڭ قوعامداعى قولدانىس اياسىن كەڭەيتۋ باعىتىنداعى جۇمىستار وسى باعدارلامالار جانە باسقا دا جوبالار شەڭبەرىندە ءوز جالعاسىن تابا بەرەتىن بولادى. ەڭ باستىسى – مەملەكەت بۇل جوبالاردىڭ بارلىعىندا دا سىزدەردەي تالانتتى دا بەلسەندى ازاماتتارعا سەنىم ارتادى»،–دەدى ول.