بۇگىن ارمەنيا استاناسى ەريەۆاندا ارمەنيانىڭ 17 وپپوزيسيالىق پارتياسى قاراباقتاعى قاقتىعىستى توقتاتۋ تۋرالى كەلىسىمگە قول قويعان پرەمەر-مينيستر نيكول پاشينيانعا قارسى ميتينگ وتكىزدى. بۇل تۋرالى شەتەل ب ا ق بەتتەرىندە جاريالاندى. 

قاراباح قاقتىعىسىنداعى جەڭىلىس ارمەنيادا ساياسي سىلكىنىس تۋدىردى. ەريەۆاندا بىرنەشە كۇننەن بەرى پرەمەر-مينيستردىڭ وتستاۆكاسىن تالاپ ەتكەن شەرۋلەر باسىلماي تۇر. بۇگىن دە نارازى توپ پارلامەنتتىڭ جانىنا جانە بوستاندىق الاڭىنا جينالىپ، "نيكول پاشينيان – ساتقىن" دەپ ۇران سالعان. ولار ازەربايجانمەن بەيبىتشىلىك كەلىسىمىگە قول قويعان ارمەنيا پرەمەر-مينيسترى نيكول پاشينياننىڭ ءوز ەركىمەن وتستاۆكاعا كەتۋىن تالاپ ەتتى.

"داشناكسۋتيۋن" ارمەنيا ريەۆوليۋسيالىق فەدەراسياسى جوعارعى ورگانىنىڭ وكىلى يشحان ساگاتەلياننىڭ ايتۋىنشا، نارازى توپ پاشينيان كەتپەسە ساعات 00:30-دا (استانا ۋاقىتىمەن 02:30-دا) باسپا ءسوز ءماسليحاتىن وتكىزەدى. وندا 12 قاراشا كۇنى كەشكە دەيىن "پاشينياننىڭ كەتۋ ماسەلەسىن شەشۋگە تىرىسادى".

بەلگىلى بولعانداي، ارميان وپپوزيسيالىق "جارقىن ارمەنيا" فراكسياسىنىڭ جەتەكشىسى ەدموند ماركۋيان پارلامەنتتىڭ كەزەكتەن تىس سەسسياسىن شاقىرۋ ءۇشىن قاجەتتى قول جينالعانىن مالىمدەدى.

Ria.ru سايتىنىڭ حابارلاۋىنشا، پوليسيا قىزمەتكەرلەرى نارازى توپتىڭ اۋماقتان كەتۋىن تالاپ ەتكەن. 

– سوعىس جاعدايى كەزىندە جينالىستارعا تىيىم سالىنادى. پوليسيا ميتينگ وتەتىن جەردەن كەتۋدى تالاپ ەتەدى. ول ءۇشىن نارازى توپقا بەس مينۋت ۋاقىت بەرىلەدى، – دەگەن پوليسيا قىزمەتكەرلەرى دىبىس كۇشەيتكىش ارقىلى.

قازىرگى ۋاقىتتا پارلامەنتتىڭ كىرەبەرىسىندە 20 ادام، عيماراتقا ىرگەلەس اۋماقتا 150-گە جۋىق ادام قالعان.

بۇعان دەيىن ارمەنيا پرەمەر-مينيسترى نيكول پاشينيان ازەربايجان پرەزيدەنتى يلحام الييەۆ جانە رەسەي پرەزيدەنتى ۆلاديمير پۋتين تاۋلى قاراباقتا اسكەري ارەكەتتەردى توقتاتۋ تۋرالى كەلىسىمگە قول قويعان ەدى. ارمەنياداعى وپپوزيسيا وكىلدەرى بۇل كەلىسىمدى "ءبىزدىڭ تاريحتاعى ەڭ ۇياتتى پاراق"  دەپ اتاعان.