اتىراۋدا سپورتشى ولىمىنە قاتىستى تەرگەۋ جۇمىستارى باياۋ ءجۇرىپ جاتىر. بۇل تۋرالى گرەپپلينگ كۇرەسىنەن الەم چەمپيونى ەسەنبەك سيعۋاتوۆتىڭ اكەسى ايتتى، دەپ حابارلادى astanatv.kz ارناسى.

وقيعا وسىدان ءۇش اي بۇرىن، 9 تامىزدا 18 جاستاعى اتىراۋلىق سپورتشى ەسەنبەك سيعۋاتوۆ جۇرەگىنەن وق جاراقاتىن الىپ، وقيعا ورنىندا جان تاپسىرعان. مارقۇمنىڭ اكەسى توقسانباي ورازعاليدىڭ ايتۋىنشا، تەرگەۋ جۇمىستارىنىڭ باياۋ ءجۇرۋى پوليسەيلەردىڭ قىلمىسقا قاتىسىنىڭ بولۋىمەن تۇسىندىرىلەدى.

– تەرگەۋ جۇمىستارى وتە باياۋ جانە دۇرىس، ورنىمەن جاسالىپ جاتقان جوق. سەبەبى قىلمىستى ۇيىمداستىرعان ازاماتتار ءبىرىنشى قاماۋعا الىنۋى كەرەك. ولار بەلگىسىز سەبەپتەرمەن ءالى كۇنگە دەيىن قامالماي جاتىر. قىلمىستى ۇيىمداستىرعان قىلمىسكەرلەر جازاسىن تارتىپ، تۇرمەدە وتىرۋى كەرەك. كۇدىكتىنىڭ بىرەۋى قارۋدى جاسىرعان. ەكىنشىسى مىلتىقتى اتقان. ەكەۋى دە پوليسيا قىزمەتكەرى بولىپ جۇمىس  جاساعان، – دەيدى مارقۇمنىڭ اكەسى.

پوليسيا دەپارتامەنتىنىڭ مالىمەتىشە، قازىرگى ۋاقىتتا قىلمىستىق كودەكستىڭ 99-بابى (ادام ءولتىرۋ) بويىنشا سوتقا دەيىنگى تەرگەۋ جۇمىستارى ءجۇرىپ جاتىر. ءتيىستى شەشىم ءىس بويىنشا ساراپتاما قورىتىندىسى دايىن بولعاننان كەيىن قابىلدانادى.

الەم چەمپيونىنىڭ اكەسى ناعىز قىلمىسكەردى قاماۋعا الىپ، جازالامايىنشا، ادىلدىك ىزدەۋدى توقتاتپايتىنىن جەتكىزدى. ەندى ول ىشكى ىستەر مينيسترلىگىنە شاعىم جازباق.