2021 جىلدىڭ قاڭتارىنان باستاپ قازاقستانداعى ءبىلىم بەرۋ ۇيىمدارىنىڭ بارلىعى "سيفرلىق بۋحگالتەريا مەن قارجى" جۇيەسىنە كوشۋدى باستايدى. بۇل تۋرالى ءبىلىم جانە عىلىم ءمينيسترى اسحات ايماعامبەتوۆ پاراقشاسىندا مالىمدەدى.
ءمينيستردىڭ ايتۋىنشا، جاڭا جۇيەنى ەنگىزۋدەگى ماقسات – كوپشىلىك ءۇشىن ءبىلىم سالاسىنداعى قارجىلاندىرۋدىڭ اشىقتىعىن جانە تيىمدىلىگىن باقىلاۋدى قامتاماسىز ەتۋ. ەندى مەكتەپتىڭ بيۋدجەتىنە، ونىڭ ءاربىر جۇمساعان تەڭگەسىنە قاتىستى اقپاراتقا ءبىلىم جانە عىلىم مينيسترلىگى، باسقا قۇزىرلى مەملەكەتتىك ورگاندار، ازاماتتىق قوعام وكىلدەرى قول جەتكىزە الادى.
بۇگىندە ءبىلىم بەرۋ سالاسىن قارجىلاندىرۋ جىلدان جىلعا ارتىپ كەلەدى. سوندىقتان ايماعامبەتوۆ سول بولىنگەن قاراجاتتى ءتيىمدى پايدالانۋ ماڭىزدىراق ەكەنىن اتاپ ءوتتى.
– كوپشىلىك مەكتەپتەردى، بالاباقشالار مەن كوللەدجدەردى ءبىلىم جانە عىلىم مينيسترلىگى رەسپۋبليكالىق بيۋدجەت ەسەبىنەن قارجىلاندىرادى دەپ ەسەپتەيدى. ودان بولەك جالاقىنىڭ ۋاقىتىلى جانە دۇرىس ەسەپتەلۋى، وقۋلىقتاردى ساتىپ الۋ نەمەسە ءبىلىم بەرۋ ۇيىمدارىنداعى جوندەۋ جۇمىستارىن دا مينيسترلىكتىڭ ءوزى تىكەلەي جۇرگىزەدى دەپ ويلايدى. ءبىراق ءىس جۇزىندە ولاي ەمەس. زاڭعا سايكەس بۇل جۇمىس اكىمدىكتەردىڭ قۇزىرىندا.
ەلىمىزدە ءبىلىم بەرۋدى باسقارۋ ورگاندارىنىڭ سانى 200-دەن اسادى، ياعني، قارجىلاندىرۋ دا سول قالالار، اۋداندار مەن وبلىستاردىڭ بيۋدجەتىنەن وتەدى. اكىمشىلەندىرۋ دەڭگەيى ءارتۇرلى ءارى كوپ بولعان سوڭ ولاردى قاداعالاپ وتىرۋ وتە قيىن.
سوندىقتان ءتىپتى وبلىستىق ءبىلىم باسقارمالارىنىڭ ءوزى كوپ جاعدايدا جالاقىنى ۋاقىتىلى تولەۋگە، وقۋلىقتاردى ساتىپ الۋعا نەمەسە مەكتەپ، كوللەدجدەردى جوندەۋ جۇمىستارىنا قاتىستى پروبلەمالاردى بۇقارالىق اقپارات قۇرالدارىنا شىققاندا نەمەسە شاعىمدار كەلىپ تۇسكەندە ءبىلىپ وتىرادى. بۇل مۇلدەم دۇرىس ەمەس، – دەدى مينيستر.
اتا-انالار مەن مۇعالىمدەرگە ولقىلىقتاردىڭ بولماعانى ماڭىزدى. سول ءۇشىن مينيستر قارجىلاندىرۋ جۇيەسىن سيفرلاندىرۋ بويىنشا باستامانى قولعا العانىن العا تارتتى. اتالعان جوبا جالاقىنى دۇرىس ەسەپتەمەۋ، قارجىلىق بۇزۋشىلىقتار، جوسپارلاۋ، قارجىلاندىرۋ كەزىندەگى پروبلەمالاردى شەشۋگە جانە ءبىلىم بەرۋ مەكەمەلەرىنىڭ قارجىلىق جاعدايىنا جەدەل مونيتورينگ جۇرگىزۋگە جاقسى مۇمكىندىك بەرەدى.
– بۋحگالتەريامەن قوسا بيۋدجەتتى جوسپارلاۋ، مەملەكەتتىك ساتىپ الۋ، تاريفيكاسيالاۋ، جۇمىسقا الۋ پروسەستەرى دە اۆتوماتتاندىرىلادى. بۇل – ءبىلىم سالاسىنا باعىتتالعان قارجىنى اشىق ءارى ءتيىمدى پايدالانۋدى قوعام بولىپ قاداعالاۋعا باعىتتالعان تاعى ءبىر قادام، – دەدى اسحات ايماعامبەتوۆ.
پىكىر قالدىرۋ