تەحنولوگيالىق كاسىپكەر يلون ماسك كوروناۆيرۋس جۇقتىرعان بولۋى مۇمكىن ەكەنىن مالىمدەدى. ميللياردەردىڭ سوزىنشە، جاعدايى ورتاشا. ءبىراق ونىڭ اۋرۋ جاعدايى تۋرالى ءارتۇرلى زەرتحانالار بىر-بىرىنە ۇقساماعان ناتيجە كورسەتكەن. بۇل تۋرالى BBC جازدى.

پاندەميا العاش باستالعان كەزدە، ماسك كوروناۆيرۋستىڭ قاۋىپتىلىگىن تومەن باعالاعان.

Tesla مەن SpaceX كومپانياسىنىڭ 49 جاستاعى باسشىسى تۆيتتەردە ءوزىنىڭ اۋرۋ بەلگىلەرى تۋرالى "ءسال جوعارى جانە تومەن" دەنە قىزۋى بارىن، كادىمگى تۇماۋ تيگەن سياقتى سەزىنگەنىن، ءبىراق دەنەسى اۋىراتىنىن جازعان.

جۇما كۇنى ول انتيگەندى جىلدام تەستىلەۋدىڭ دۇرىستىعىنا كۇماندانىپ، تۆيتتەردە "وتە جالعان نارسە بولىپ جاتىر. بۇگىن ءتورت رەت كوۆيدكە تەست تاپسىردىم. ەكى تەست تەرىس، ەكەۋى وڭ بولىپ شىقتى. سول اپپارات، سول تەست، سول مەدبيكە" دەپ جاريالاعان.

قازىرگى كەزدە اقش-تا شامامەن 10،9 ميلليون ادام كوروناۆيرۋس جۇقتىرعان. 245 مىڭنان استام ادام ۆيرۋستان قايتىس بولعان، 67 مىڭنان استام ادام اۋرۋحانادا جاتىر.

اقش-تىڭ 35 شتاتىندا كوپشىلىك ورىنداردا بەتپەردە كيۋ تالاپ ەتىلەدى.