باس سانيتار دارىگەردىڭ قاۋلىسىنا قاراماستان نۇر-سۇلتان قالاسىندا قالجا تويى وتكەن، دەپ حابارلايدى Qamshy.kz اقپارات اگەنتتىگى نۇر-سۇلتان قالاسىنىڭ پوليسيا دەپارتامەنتىنىڭ باسپا ءسوز قىزمەتىنە سىلتەمە جاساپ.
توي ءوتىپ جاتقانىن كارانتين رەجيمى بۇزىلماۋىن قاداعالايتىن پوليسەيلەر انىقتاعان.
توي 13 قاراشادا "ءاسيا" كافەسىندە ساعات 15.56-دا وتكەن. پوليسەيلەردىڭ ايتۋىنشا، تويعا كەلگەن 40 ادام سانيتارلىق ەرەجەنى ساقتاماعان. تويدا ەگدە كىسىلەرمەن قاتار كىشكەنتاي بالالار دا بولعان.
تويدى ۇيىمداستىرۋشىلار قوناقتاردى قىزمەتكەرلەرگە ارنالعان ەسىكتەن كىرگىزگەن.
ەلوردالىق پوليسەيلەر ءبىر تاۋلىكتە 217 نىساندى تەكسەرىسىپ، 17 كاسىپكەردىڭ كارانتين رەجيمىن بۇزعانىن انىقتاعان.
ءتارتىپ بۇزعاندار جاۋاپكەرشىلىككە تارتىلادى.
