بۇگىن ءماجىلىس سپيكەرى نۇرلان ءنىعماتۋليننىڭ توراعالىعىمەن پالاتا بيۋروسى ءوتىپ، وندا الداعى جالپى وتىرىستىڭ كۇن ءتارتىبى ناقتىلاندى.

ءماجىلىس ءبىرىنشى وقىلىمدا «قازاقستان رەسپۋبليكاسىنىڭ ۇكىمەتى تۋرالى» كونستيتۋسيالىق زاڭعا وزگەرىستەر ەنگىزۋ جانە مەملەكەت باسشىسىنىڭ 2020 جىلعى 1 قىركۇيەكتەگى «جاڭا جاعدايداعى قازاقستان: ءىس-قيمىل كەزەڭى» اتتى قازاقستان حالقىنا جولداۋىنىڭ جەكەلەگەن ەرەجەلەرىن ىسكە اسىرۋعا قاتىستى زاڭ جوباسىن تالقىلاماق.

سونىمەن قاتار، پالاتا ءبىرىنشى وقىلىمدا تۋريستىك قىزمەت، نورماشىعارماشىلىقتى جەتىلدىرۋ ماسەلەلەرى بويىنشا تۇزەتۋلەر جانە ادۆوكاتتىق قىزمەت پەن زاڭ كومەگىنە قاتىستى دەپۋتاتتىق زاڭ جوبالارىن قارايتىن بولادى.

الداعى جالپى وتىرىستا ورتالىق جانە جەرگىلىكتى مەملەكەتتىك ورگاندار اراسىندا اۋىزسۋمەن جابدىقتاۋدى سۋبسيديالاۋ جونىندەگى وكىلەتتىكتەردىڭ اراجىگىن اجىراتۋ ماسەلەلەرى بويىنشا دەپۋتاتتىق زاڭ جوباسى ءبىرىنشى وقىلىمدا قارالادى دەپ جوسپارلانۋدا.

سونداي-اق دەپۋتاتتار قاراۋىنا دەنە شىنىقتىرۋ جانە سپورت ماسەلەلەرى بويىنشا زاڭ جوباسى دا ۇسىنىلدى.

بيۋرونىڭ كۇن ءتارتىبىنىڭ جوباسىندا ءماجىلىس دەپۋتاتتارى ەكىنشى وقىلىمدا ءبىرقاتار ەكولوگيالىق زاڭ جوبالارىن قارايدى. ولار ەكولوگيالىق كودەكسپەن وعان ىلەسپە زاڭ جوبالارى.

ەكىنشى وقىلىمدا قارالاتىندار قاتارىندا قوعامدىق كەڭەستەردىڭ قىزمەتى تۋرالى جانە دەپۋتاتتار ازىرلەگەن كۇزەت قىزمەتى ماسەلەلەرى زاڭ جوبالارى، سونداي-اق، ادامداردى قازاقستان شەگىنەن تىس جەرگە شىعارىپ جىبەرۋگە جانە بيۋدجەت زاڭناماسىن جەتىلدىرۋگە قاتىستى زاڭ جوبالارى بار.

سونىمەن بىرگە الداعى جالپى وتىرىستا پالاتا ديپلوماتيالىق قىزمەت تۋرالى زاڭ جوباسىن جۇمىسقا الماق.

ءماجىلىستىڭ باسپا ءسوز قىزمەتى