بۇگىن پرەزيدەنت قاسىم-جومارت توقايەۆتىڭ توراعالىعىمەن قازاقستاندا كوروناۆيرۋس ينفەكسياسىنىڭ تارالۋىنا جول بەرمەۋ ماسەلەلەرى جونىندە كەڭەس ءوتتى. دەنساۋلىق ساقتاۋ ءمينيسترى الەكسەي سوي ەلدەگى سانيتارلىق-ەپيدەميولوگيالىق جاعداي مەن قابىلدانىپ جاتقان شارالار تۋرالى باياندادى، دەپ حابارلادى دەنساۋلىق ساقتاۋ مينيسترلىگىنىڭ باسپا ءسوز قىزمەتى.

– 16 قاراشاداعى ەپيدەميولوگيالىق جاعدايدى باعالاۋ ماتريساسىنا سايكەس رەسپۋبليكا سارى ايماقتا تۇر. شىعىس قازاقستان جانە سولتۇستىك قازاقستان وبلىسى ينفەكسيا تارالۋ ءقاۋپى جوعارى قىزىل ايماقتا. ورتاشا ءقاۋىپتى سارى ايماقتا – پاۆلودار، اقمولا، قوستاناي وبلىستارى، نۇر-سۇلتان جانە الماتى قالالارى. قالعان ءوڭىر سالىستىرمالى تۇردە ينفەكسيانىڭ تارالۋ ءقاۋپى تومەن جاسىل ايماقتا.

كۆي-گە شالدىققاندار سانى ارتقان جاعدايدا، حالىققا ساپالى جانە ۋاقتىلى كومەك كورسەتۋ ءۇشىن مەديسينالىق ۇيىمدار 71 مىڭ توسەك-ورىن دايىنداپ وتىر. ءقازىر ينفەكسيالىق توسەكتىڭ 21% جانە رەانيماسيالىق توسەكتىڭ 17% پاسيەنت بار. ازاماتتارعا ۇيدە مەديسينالىق كومەك كورسەتۋ ءۇشىن كوشپەلى ءموبيلدى بريگادالار دايىندالدى. ءموبيلدى بريگادالار بيىل شىلدەدەن بەرى 280 مىڭنان استام قىزمەت كورسەتتى.  شىلدە ايىمەن سالىستىرعاندا ءقازىر جەدەل مەديسينالىق كومەك شاقىرۋشىلار سانى 43،8%، ال كۆي بويىنشا – 79%  تومەندەدى، – دەدى ا. سوي.