ءبىلىم جانە عىلىم ءمينيسترى اسحات ايماعامبەتوۆ وقۋ ساۋاتتىلىعىنداعى ءبىرقاتار ماسەلەلەردى اتادى. بۇل تۋرالى ول Facebook پاراقشاسىندا جازدى.

ول ءوز سوزىندە باسەكەگە قابىلەتتى ءارى قازىرگى قوعامدا ءوزارا بايلانىس ورناتا بىلەتىن تۇلعا بولىپ قالىپتاسۋ ءۇشىن كىتاپ وقۋعا دەگەن قۇشتارلىقتىڭ اسەرى مول ەكەنىن اتاپ ايتتى.

"كىتاپ وقۋ ساۋاتتىلىعى دەڭگەيىن انىقتاۋ ماقساتىندا الەمنىڭ كوپتەگەن ەلدەرى OECD جانە IEA سىندى حالىقارالىق سالىستىرمالى زەرتتەۋلەرىنە قاتىسىپ، ناتيجەلەرىن قولدانادى. 

PISA زەرتتەۋلەرىنىڭ ناتيجەلەرى بويىنشا قازاقستان وقۋشىلارى وقۋ ساۋاتتىلىعى بويىنشا ەكونوميكالىق ىنتىماقتاستىق جانە دامۋ ۇيىمىنا مۇشە ەلدەرىندەگى ءوز قاتارلاستارىنان ەداۋىر ارتتا قالىپ وتىر.

PIAAC حالىقارالىق زەرتتەۋىنىڭ قورىتىندىسى بويىنشا ەلىمىزدەگى 16-دان باستاپ 55 جاسقا دەيىنگى ازاماتتاردىڭ دا وقۋ ساۋاتتىلىعى ناشار بولىپ شىقتى" دەدى مينيستر.

ونىڭ ايتۋىنشا، ەلدەگى ەرەسەك ازاماتتاردىڭ دا وقۋ ساۋاتتىلىعى تومەن دەڭگەيدە.

"بۇل – بۇگىن عانا بەلگىلى بولعان پروبلەما ەمەس، جىلدار بويى قوردالانعان ماسەلە. ءبىزدىڭ بالالارىمىز كىتاپتى وقۋعا كەلگەندە جالقاۋلىق تانىتاتىنى ءبىر بولەك، كەيدە وقىعان ءماتىندى ناشار ءتۇسىنىپ، دۇرىس قابىلداي المايدى. وعان قوسا تالداۋ جانە قورىتىندى جاساۋ داعدىلارى دا اقساپ تۇر" دەدى ول.

وسىلايشا ول ۇلتتىڭ باسەكەگە قابىلەتتىلىگىنە اسەر ەتەتىن ۇلكەن پروبلەما ەكەنىن باسا ايتتى.

"سوندىقتان دا ۇلتتىق قوعامدىق سەنىم كەڭەسىنىڭ وتىرىسىندا مەملەكەت باسشىسى قاسىم-جومارت توقايەۆ ۇلتىمىزدىڭ وقۋعا قۇشتارلىعىن ارتتىرۋ ءۇشىن ءتيىستى شارالاردى قابىلداۋدى تاپسىردى. ول ءۇشىن بالا مەكتەپ جاسىنان باستاپ كوركەم ادەبيەتتى وقۋعا ۇمتىلۋى قاجەت. ءبىز وسى ماقساتتا جاعداي جاساۋعا مىندەتتىمىز" دەپ اتاپ ايتتى اسحات ايماعامبەتوۆ.