پرەمەر-مينيستر اسقار مامين كوروناۆيرۋس ينفەكسياسى تۋرالى ۆەدومستۆوارالىق كوميسسيا وتىرىسىن وتكىزدى.

دەنساۋلىق ساقتاۋ مينيسترلىگىنىڭ مالىمەتىنە سۇيەنسەك، كوروناۆيرۋسپەن سىرقاتتانۋشىلىقتىڭ ءوسۋى قازاقستاننىڭ بارلىق وڭىرلەرىندە دەرلىك تىركەلدى. ۆيرۋستىڭ رەپرودۋكتيۆتىلىك كورسەتكىشى رەسپۋبليكا بويىنشا 1،07 پايىزدى قۇرايدى. ينفەكسيالىق توسەك-ورىنداردىڭ تولىعۋى – 22%، رەانيماسيالىق توسەك-ورىنداردىڭ تولىعۋى – 17%. 

"قىزىل ايماقتا" 5 ءوڭىر قالىپ وتىر: شىعىس قازاقستان، پاۆلودار، قوستاناي، سولتۇستىك قازاقستان، اقمولا وبلىستارى.

"سارى ايماقتا" 2 ءوڭىر بار: باتىس قازاقستان وبلىسى جانە نۇر-سۇلتان قالاسى.

ۇكىمەت باسشىسى دەنساۋلىق ساقتاۋ، يندۋستريا مينيسترلىكتەرىنە اكىمدىكتەرمەن بىرلەسىپ، مەديسينالىق جابدىقتاردى جەتكىزۋدى اياقتاۋدى جانە ينفەكسيالىق ستاسيونارلاردىڭ رەانيماسيالىق بولىمشەلەرىن تولىق جابدىقتاۋدى قامتاماسىز ەتۋدى تاپسىردى. 

سونداي-اق اسقار مامين ەپيدەميولوگيالىق احۋالدىڭ ناشارلاۋى مۇمكىن جاعدايدا ۆەدومستۆولىق اۋرۋحانالار مەن گوسپيتالداردىڭ 100% دايىندىعىن قامتاماسىز ەتۋدى ايتتى. 

ول ۆەدومستۆوارالىق وتىرىستا ىشكى ىستەر، ەڭبەك، ءبىلىم، قورعانىس مينيسترلىكتەرىنە اكىمدىكتەرمەن بىرلەسىپ، ۇيىمداستىرىلعان ۇجىمداردا پروفيلاكتيكالىق جانە ەپيدەمياعا قارسى ءىس-شارالاردىڭ ساقتالۋىنا باقىلاۋدى كۇشەيتۋدى تاپسىردى. 

سونىمەن قاتار دەنساۋلىق ساقتاۋ مينيسترلىگىنە، اكىمدىكتەرگە كوروناۆيرۋس ينفەكسياسىنا جاسالعان زەرتحانالىق زەرتتەۋلەردىڭ دۇرىستىعىن (قايتا تەستىلەۋدى) قامتاماسىز ەتۋ بويىنشا شارالار قابىلداۋدى دا اتاپ ءوتتى.

پرەمەر-مينيستر دەنساۋلىق ساقتاۋ مينيسترلىگىنە ءبىر اپتا مەرزىمدە دارى-دارمەكتىڭ شەكتى قۇنىن تومەندەتۋ ماقساتىندا كوروناۆيرۋسقا قارسى پرەپاراتتاردىڭ باعاسىن رەتتەۋ ءتارتىبىن وزگەرتۋدى تاپسىردى.