ازەربايجان مەن ارمەنيا اراسىنداعى سوعىس اياقتالعانىمەن ەكى ەل ازاماتتارى سوعىستىڭ زاردابىن ءالى تارتىپ جاتىر، دەپ جازادى Qamshy.kz اقپارات اگەنتتىگى BBC-گە سىلتەمە جاساپ.

زامين باندالييەۆ ءولىم اۋزىنان امان قالدى. دارىگەرلەر ونىڭ جاراقاتىن ەمدەگەن سايىن ول ولىممەن بەتپە-بەت كەلگەن ساتكە قايتا ورالاتىنداي.

اكەسى بالاسىنىڭ قينالعانىن كورمەۋ ءۇشىن ۇيدەن شىعىپ كەتەدى.

– بالامدى كورگەندە ەسەڭگىرەپ قالدىم. ءزاميننىڭ كولىگىن كورگەندە ونىڭ قازا بولعانىنا سەنىمدى ەدىم. ءبىرىنشى قۇداي، ودان كەيىن مەديسينا قىزمەتكەرلەرىنىڭ ارقاسىندا بالام امان قالدى. بومبا ماشينانىڭ جۇك سالعىشىنىڭ كۇل-تالقانىن شىعارعان. سنارياد مەتالل مەن ورىندىقتى تەسىپ شىققان. بالامنىڭ جانىندا ەشكىم وتىرماعانىنا شۇكىر. ول ادام امان قالۋى ەكى تالاي ەدى. كەنەتتەن قاتتى داۋىس شىقتى، ارتىنشا جارىلىس بولدى. مەن داۋىستى ەستىدىم، ءبىراق ەشتەڭە ەسىمدە جوق. سەبەبى ەسىمدى جوعالتتىم. مەنى اۋرۋحاناعا جەتكىزدى. مەن ءالى كۇنگە دەيىن اۋرۋدان دۇرىس ۇيىقتاي المايمىن. دۇرىس دەمالا الماعاندىقتان كوپ سويلەي المايمىن، – دەيدى زامين باندالييەۆ.

ازەربايجان 28 قازاندا ارمەنيانىڭ تىيىم سالىنعان كاسسەتالىق بومبانى پايدالانىپ بارداعا وق جاۋدىرىپ، سالدارىنان 20 بەيبىت تۇرعىن قازا تاپقانىن ءمالىم ەتتى.  

ەكى ەلدە دە كاسسەتالىق بومبانى قولدانۋعا تىيىم سالىنعان. ارمەنيا دا، ازەربايجان دا اتالمىش بومبا ءتۇرىن قولدانباعانىن ايتادى.

ادام قۇقىعىن قورعايتىن توپ اقپاراتتىڭ راس-وتىرىگىن انىقتادى. تەكسەرىس جۇمىسى بارىسىندا كاسسەتالىق بومبا قولدانىلعانى انىقتالدى.

ارمەنيا اگدام جانىنداعى جەردى 1990 جىلدارى تارتىپ العان. سوعىستى توقتاتۋ ماقساتىندا بۇل جەر ازەربايجانعا قايتىرىلدى.

– مەن اگدامدى، اۋىلىمىزدى ەشقاشان كورگەن ەمەسپىن. مەن ءوز جەرىمدى كورگىم كەلەدى، – دەيدى ازەربايجان تۇرعىندارىنىڭ ءبىرى.

فۋزۋلي ازەربايجانعا قايتارىلعان ەكىنشى جەر. ءفۋزۋليدىڭ بۇرىنعى تۇرعاندارى ۇيلەرىن كورۋ ءۇشىن كەلدى.

– مەن 52 جىل تاجىريبەسى بار ءمۇعالىممىن. مەن فۋزۋليدە دۇنيەگە كەلدىم.  بۇگىن ءوز ءۇيىمنىڭ الدىندا تۇرمىن. ءقازىر قانداي سەزىمدە ەكەنىمدى سوزبەن ايتىپ جەتكىزۋ مۇمكىن ەمەس، – دەيدى قالانىڭ بۇرىنعى تۇرعىنى.

كوپ ادام ءالى ۇيىنە ورالا الماي وتىر. ولار ازەربايجان بيلىگى قالانى مينادان تازارتۋىن كۇتۋدە.