وتكەن كۇندەرى اقش پرەزيدەنتى دونالد ترامپ ۆاشينگتون مەن تەگەران اراسىنداعى شيەلەنىستىڭ ارتۋىنا بايلانىستى يرانعا ەسكەرتۋ رەتىندە تاياۋ شىعىسقا "B-52" يادرولىق بومبالاۋشىلارىن جىبەردى. بۇل تۋرالى The Sun گازەتى حابارلادى.
"دجو بايدەن قاڭتار ايىندا پرەزيدەنت بولىپ تاعايىندالماس بۇرىن ترامپ يرانعا شابۋىل جاساۋ كەرەك پە دەگەن ماسەلەنى تالقىلاپ جاتىر" دەپ جازدى بريتانيالىق باسىلىم.
اقش ورتالىق قولباسشىلىعى اۋىر بومبالاۋشى ۇشاقتار كەلگەنىن راستادى جانە ۇشاقتار "اگرەسسيانى توقتاتادى جانە اقش سەرىكتەستەرى مەن وداقتاستارىن الاڭسىزداندىرادى" دەپ مالىمدەدى.
بريتانيالىق گازەتتىڭ اقپاراتىنا سايكەس، اقش اسكەري-اۋە كۇشتەرىندەگى ەڭ ۇلكەن ۇشاق "ستراتوفورترەس" ۇشاقتارىنىڭ كەم دەگەندە ۇشەۋى يزرايلدەن ۇشىپ ءوتتى.
وسى جىلدىڭ قاڭتار ايىندا اقش اسكەري كۇشتەرى يران گەنەرال-مايورى كاسەم سولەيمانينيدى يراكتاعى زىمىران سوققىسى كەزىندە ولتىرگەن. وسىدان كەيىن ەكى ەل اراسىندا سوعىس باستالۋ ءقاۋپى تۋدى.
شابۋىلدان بىرنەشە كۇن وتكەن سوڭ تەگەران كەك قايتارىپ، اقش اسكەري كۇشتەرى ورنالاسقان يراكتىڭ ەكى بازاسىنا بالليستيكالىق زىمىران سەرياسىن ۇشىردى.
"اقش-تىڭ پرەزيدەنتتىگىنەن كەتىپ جاتقان ترامپ يرانعا ەسكەرتۋ جاساۋ ءۇشىن تاياۋ شىعىسقا "B-52" يادرولىق بومبالاۋشى ۇشاقتارىن جىبەرىپ، حاسان ءرۋحانيدىڭ ەلىنە سەس كورسەتتى" دەپ جازدى The Sun گازەتى.
پىكىر قالدىرۋ