الماتى قالاسى اۋماقتىق كاسىپوداقتار بىرلەستىگى جاڭا شاقىرىلعان پارلامەنت ءماجىلىسى مەن بارلىق دەڭگەيدەگى ءماسليحاتتار دەپۋتاتتارىن سايلاۋعا باقىلاۋشى رەتىندە قاتىساتىنىن مالىمدەدى.
وزدەرىڭىز بىلەتىندەي، سايلاۋ قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ جارلىعىمەن 2021 جىلدىڭ 10 قاڭتارىنا تاعايىندالعان بولاتىن.
بۇل شەشىم ەڭبەك ادامىنىڭ قۇقىقتارى مەن زاڭدى مۇددەلەرىن قورعايتىن،قازاقستان رەسپۋبليكاسىنداعى ەڭ ءىرى قوعامدىق بىرلەستىك ماڭىزدى ىشكى ساياسي پروسەستەردەن تىس قالا المايتىندىعىمەن تۇسىندىرىلەدى.
الماتى قالاسى اۋماقتىق كاسىپوداقتار بىرلەستىگى ەلدىڭ سايلاۋ زاڭناماسىنىڭ بارلىق نورمالارىنىڭ ساقتالۋىن قاداعالاپ، سايلاۋ كۇنى سايلاۋ پروسەستەرىنىڭ اشىقتىعىن قاداعالاماق.
قۇرامىنا مەگاپوليستىڭ 715 باستاۋىش كاسىپوداق ۇيىمدارى كىرەتىن ۇيىم، ازاماتتاردىڭ تاڭداۋ ەركىندىگى جۇمىس بەرۋشىلەر نەمەسە اتقارۋشى ورگاندار وكىلدەرىنىڭ قانداي-دا ءبىر قىسىمىمەن بۇزىلماۋى كەرەك دەپ سانايدى.
- بىرلىك، ادىلەتتىلىك، دامۋ - بۇل الماتى قالاسى اۋماقتىق كاسىپوداقتار بىرلەستىگى قىزمەتىنىڭ نەگىزگى قاعيداتتارى. ءبىز جۇمىسشىلاردىڭ ماسەلەلەرىن شەشۋگە قاتىسۋ جانە ولاردىڭ تاڭداۋ ەركىندىگىنە كونستيتۋسيالىق قۇقىعىن جۇزەگە اسىرۋدا قولداۋ كورسەتۋ ەڭ ماڭىزدى جالپى ادامزاتتىق قۇندىلىقتار دەپ سانايمىز. ءبىزدىڭ الەۋمەتتىك سەرىكتەستەرىمىزبەن ىنتىماقتاستىققا نەگىزدەلگەن بىرلەسكەن جۇمىس قانا قوعامنىڭ نەگىزگى دەموكراتيالىق قۇندىلىقتارىن ساقتاۋدا ايتارلىقتاي تابىستارعا جەتۋگە مۇمكىندىك بەرەدى دەپ سەنەمىز، - دەلىنگەن الماتى قالاسى كاسىپوداقتارىنىڭ اۋماقتىق بىرلەستىگىنىڭ ۇندەۋىندە.
پىكىر قالدىرۋ