بريتاندىق Financial Times باسىلىمى الماتى اكىمى باقىتجان ساعىنتايەۆتىڭ قىزى مەرۋەرت يبراگيم Net-a-Porte ينتەرنەت-دۇكەنىندە "وتە ماڭىزدى تۇتىنۋشى" (EIP، extremely important person) ستاتۋتىسىنا يە ەكەنىن ايتتى. بۇل ستاتۋستى كوپ ساۋدا جاسايتىن كليەنتتەرگە بەرەدى، دەپ جازادى exclusive.kz.
ازاتتىق راديوسىنىڭ مالىمەتىنشە، اكىمنىڭ قىزى تۇراقتى ساۋدا جاسايتىن Net-a-Porter دۇكەنى ەۋروپانىڭ ءسان الەمىندەگى سوڭعى ۇلگىدەگى كيىمدەردى ساتادى.
بريتاندىق Financial Times باسىلىمى وتكەن اپتادا مەرۋەرت يبراگيمنىڭ لوندون، قازاقستان جانە دۋباي اراسىندا قالاي ساياحاتتايتىنىن جانە قىمبات برەند كيىمدەردى قالاي ساتىپ الاتىنىن ەگجەي-تەگجەيلى جازعان. ونىڭ بۇرىنعى كۇيەۋى باحىت يبراگيم بانك اقشاسىن جىمقىرعانى ءۇشىن بىرنەشە جىلعا باس بوستاندىعىنان ايىرىلعان.
Financial Times رەپورتەرى EIP ستاتۋسى تۇراقتى كليەنتتەرگە "قاراپايىم ادامداردا" جوق ارتىقشىلىقتار تۋرالى ايتىپ بەردى. ماسەلەن، ولارعا جەكە كورسەتىلەدى، ءتۇرلى شارالارعا شاقىرۋ قاعازى بەرىلەدى. ارنايى كليەنتتەر جاڭا تۇسكەن كيىم ۇلگىلەرىن سايتقا جاريالانباس بۇرىن ساتىپ الا الادى. ءبىر جىلدا ەكى مارتە جەكە شوپپەردىڭ قىزمەتىنە جۇگىنىپ، التى ايعا الدىن الا تاپسىرىس بەرە الادى.
EIP ستاتۋسىن الۋ ءۇشىن بەلگىلەنگەن سوماعا كەز كەلگەن كاتەگوريا بويىنشا ساۋدا جاساۋعا بولادى. Net-a-Porter ناقتى سوماسىن ايتۋدان باس تارتتى.
دۇكەن جۇمىسىن زەرتتەۋ ءۇشىن Financial Times رەپورتەرى دە اتالمىش ستاتۋسقا يە بولعان. Net-a-Porter دۇكەنى سول ءۇشىن ودان 10 مىڭ فۋنت (5 ميلليون 662 مىڭ تەنگە) ۇستاپ قالعان.
Financial Times باسىلىمىنىڭ ايتۋىنشا، سايتتا باقىتجان ساعىنتايەۆتىڭ قىزى مەرۋەرت يبراگيم Buro24/7 قازاقستاندىق ءسان جوباسىنىڭ نەگىزىن قالاۋشى دەپ كورسەتىلگەن. سايتتا مەرۋەرت ءابدىردىڭ "ماڭىزدى ساتىپ الۋشى" قاتارىنا كىرگەنىنە 3 جىل بولعانى ايتىلادى.
رەپورتەر برەند كيىمدەردىڭ قانشا تۇراتىنىن دا ايتتى. ەتىك – 585 فۋنت ستەرلينگ (331 مىڭ تەڭگە)، جەيدە – 515 (291 مىڭ تەڭگە)، سومكە – 1 250 (707 مىڭ تەڭگە)، پلاشش – 2 175 فۋنت ستەرلينگ تۇرادى.
بۇعان دەيىن الماتىنىڭ المالى اۋداندىق سوتى RBK Bank اقشاسىن جىمقىردى دەپ ايىپتالعان 37 ادامعا شەشىم شىعاردى. ونىڭ ىشىندە Qazaq Bankء-تىڭ بۇرىنعى اكسيونەرى مەن ساعىنتايەۆتىڭ بۇرىنعى كۇيەۋ بالاسى دا بار. باحىت يبراگيموۆ 8 جىلعا باس بوستاندىعىنان ايىرىلدى جانە مۇلكى تاركىلەندى.
پىكىر قالدىرۋ