الماتىدا ەلىمىزدىڭ تۇڭعىش پرەزيدەنتى كۇنىنە ارنالعان «مەن جاستارعا سەنەمىن!» VIII رەسپۋبليكالىق جاستار فورۋمىنىڭ جەڭىمپازدارىن ماراپاتتاۋ ءراسىمى ءوتتى.

بيىلعى جىلى يننوۆاسيا جانە شىعارماشىلىق، جاسامپازدىق پريزماسى ارقىلى ءپاتريوتيزمدى دامىتۋعا باعىتتالعان بايقاۋ ونلاين فورماتتا ۇيىمداستىرىلدى.

ءال-فارابي اتىنداعى قازۇۋ رەسپۋبليكالىق جاستار فورۋمىن ق ر تۇڭعىش پرەزيدەنتى كۇنىنە ارناپ 2013 جىلدان بەرى وتكىزىپ كەلەدى. بيىل شارا ءساۋىر ايىنان باستاۋ الىپ الەمدىك پاندەمياعا بايلانىستى ونىڭ بارلىق كەزەڭدەرى ونلاين رەجيمدە ءوتتى. جىل سايىنعى فورۋمعا قاتىسۋشىلار كەلەسى بايقاۋلار بويىنشا ب ا ق سىناستى: «مەن ءوز ەلىمنىڭ وركەندەۋى ءۇشىن نە ىستەي الامىن» ۇزدىك ەسسە، «ەلىمىزدىڭ يننوۆاسيالىق دامۋىنا قوسقان ناقتى ۇلەسىم» اتتى ۇزدىك يننوۆاسيالىق جوبا؛ «مەن جاستارعا سەنەمىن!» ازاماتتىق-پاتريوتتىق باعىتتاعى پوەزيالىق شىعارما جانە «ماڭگىلىك ەل مۇراتىم!» اۆتورلىق پاتريوتتىق اندەر، «Sanaly urpaq» پاراساتتىلىق پرينسيپتەرىن ناسيحاتتايتىن ۇزدىك جوبا.

فورۋم كەڭىنەن تانىلىپ، دامىپ كەلەدى، ونىڭ نوميناسيالارىنىڭ ءتىزىمى جىل سايىن جاڭارتىلۋدا. ءابۋ ناسىر ءال-فارابيدىڭ 1150 جىلدىعى مەن ەرىكتىلەر جىلىندا ونى «Qaiyrymdy qoǵam» ستۋدەنتتىك قايىرىمدىلىق جوباسىنىڭ بايقاۋى تولىقتىردى. سونىمەن قاتار، فورۋمنىڭ مەن_jastarga_senemin_kaznu ينستاگرام-اككاۋنتىنىڭ وقىرماندارى مەن كورەرمەندەر انىقتايتىن «كورەرمەندەر كوزايىمى سىيلىعى» نوميناسياسى تاعايىندالدى.

فورۋمعا قاتىسۋ ءۇشىن ەلىمىزدىڭ بارلىق ايماقتارىنان 5 مىڭعا جۋىق ستۋدەنت تىركەلدى. شىعارماشىلىق جوبالار مەن بەينە پرەزەنتاسيالاردى بەدەلدى ساراپشىلار – قوعام قايراتكەرلەرى، بيزنەس وكىلدەرى، مەملەكەتتىك ورگاندار، مادەنيەت جانە ونەر قايراتكەرلەرى مەن عالىمداردان جينالعان تاۋەلسىز قازىلار القاسى باعالادى. ناتيجەسىندە 300 ۇزدىك جوبا سوڭعى تۋردىڭ فينالىنا ءوتتى.

قازۇۋ رەكتورى اكادەميك عالىم مۇتانوۆ فورۋمنىڭ فيناليستەرىن قارسى الا وتىرىپ، ولاردىڭ تاۋەلسىز قازاقستاننىڭ بولاشاعى ەكەنىن اتاپ ءوتتى. ناق وسى جاس ۇرپاقتىڭ الدىندا جاسامپاز ىستەر ەستافەتاسىن جالعاستىرۋ جانە ەلدىڭ وركەندەۋىن قامتاماسىز ەتۋ مىندەتى تۇر.

«مۇنداي ميسسيانى تەك پاتريوتتى، دەنى ساۋ جانە ادامگەرشىلىك تۇرعىدا باسەكەگە قابىلەتتى جانە الەۋمەتتىك جاۋاپتى جاستار عانا جۇزەگە اسىرا الادى. سوندىقتان ءارقايسىڭىز ەڭ الدىمەن، ءوز وتباسىڭىزدىڭ جانە ەڭ باستىسى، ءوز وتانىڭىزدىڭ الدىنداعى ۇلكەن جاۋاپكەرشىلىكتى دۇرىس ۇعىنىپ، ءتۇسىنىپ، سەزىنۋلەرىڭىز كەرەك! فورۋم سىزدەر ءۇشىن جاڭا جەتىستىكتەرگە باستاۋ بولادى دەپ ۇمىتتەنەمىن»، - دەپ اتاپ ءوتتى رەكتور.

بايقاۋ لاۋرەاتتارى مەن جۇلدەگەرلەرى ديپلومدار جانە باعالى سىيلىقتارمەن ماراپاتتالادى، ال جەڭىمپازدار قازۇۋ-دا ءبىر جىل تەگىن وقۋ گرانتىنا يە بولدى.

ۇزدىك ستۋدەنتتىك يننوۆاسيالىق جوبا بايقاۋىندا ە.بوكەتوۆ اتىنداعى قارمۋ-دەن پاۆەل يۆاچيەۆ جەڭىسكە جەتتى. قازىلار القاسى ش.ءۋاليحانوۆ اتىنداعى كوكشەتاۋ ۋنيۆەرسيتەتىنەن قۋاندىق سەرىكوۆتىڭ جۇمىسىن ۇزدىك ەسسە دەپ، ال پوەتيكالىق شىعارمالار بويىنشا ح.دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ ستۋدەنتى نۇرجول جاقسىلىقتىڭ تۋىندىسىن ۇزدىك دەپ تانىدى. ا.بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنەن نيكولاي ياروشەنكو اۆتورلىق پاتريوتتىق ءان بايقاۋىندا ءبىرىنشى بولسا، س. امانجولوۆ اتىنداعى شقمۋ-دىڭ ستۋدەنتى ديدار جارقىن «Sanaly urpaq» پاراساتتىلىق قاعيداتتارىن ىلگەرىلەتۋ جوباسىمەن ۇزدىك دەپ تانىلدى.

«Qaiyrymdy qoǵam» ستۋدەنتتىك قايىرىمدىلىق جوبالار بايقاۋىندا قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتى نادىرحانوۆا ديليارا جەڭىسكە جەتتى. تالانتتى جاس كومپوزيتور راحات-بي ءابدىساعين ۇلى ويشىل ءال-فارابيدىڭ مەرەيتويىنا ارناپ فورتەپيانو مەن سيمفونيالىق وركەسترگە جازعان «Qubylys» اتتى سيمفونيالىق پوەماسى ءۇشىن فورۋمنىڭ ارنايى ديپلومىمەن ماراپاتتالدى. رەسپۋبليكالىق فورۋمدى ۇيىمداستىرۋشى – ءال-فارابي اتىنداعى قازۇۋ نوميناسيا لاۋرەاتتارى مەن بايقاۋلاردىڭ العاشقى ءۇش ورىن يەگەرلەرىنە كەلەسى جىلى ۋنيۆەرسيتەتتە وتەتىن جازعى كوشباسشىلىق مەكتەبىنە قاتىسۋعا مۇمكىندىك بەردى. «مەن جاستارعا سەنەمىن!» VIII رەسپۋبليكالىق جاستار فورۋمىنىڭ جەڭىمپازدارىن سالتاناتتى ماراپاتتاۋ ءراسىمىنىڭ ترانسلياسياسىن AlFarabiTV YouTube ارناسىنان كورۋگە بولادى.