الماتىدا «قازاقستان ءمۇعالىمى 2020» ۇلتتىق سىيلىعىنىڭ 10 لاۋرەاتى انىقتالدى. باس جۇلدەنى – نۇر-سۇلتان قالاسىنداعى «نزم» فيليالىنىڭ حيميا ءپانى ءمۇعالىمى دينارا بەيسەمبايەۆا جەڭىپ الدى.

دينارا بەيسەمبايەۆا — حيميا ءپانىنىڭ ءمۇعالىمى، ەكولوگيا ماگيسترى، «راسشيرەننوە ەسسە» جەتەكشىسى، عىلىمي ماقالالار مەن باسىلىمداردىڭ اۆتورى، دارىندى بالالاردىڭ ءبىلىم الۋ قاجەتتىلىكتەرىنە ارنالعان باعدارلامانىڭ جاساۋشىلارىنىڭ ءبىرى. ونىڭ وقۋشىلارى عىلىمي سايىستاردىڭ جانە حالىقارالىق وليمپيادالاردىڭ جەڭىمپازدارى مەن جۇلدەگەرلەرى.

10 لاۋرەات قازاقستاننىڭ اتىنان جۇلدە قورى 1 ميلليون اقش دوللارىن قۇرايتىن «الەم ءمۇعالىمى-2021» جاھاندىق سىيلىعىنا (Global Teacher Prize 2021) نوميناسيالاناتىن بولادى.

ولاردىڭ قاتارىندا سىيلىق جەڭىمپازى — دينارا بەيسەمبايەۆا، جانە 9 فينالعا قاتىسۋشىلار بار. اتاپ ايتار بولساق:

– ولگا كيم — قاراعاندى قالاسى، № 27 ورتا مەكتەبىنىڭ باستاۋىش سىنىپ ءمۇعالىمى، ەرەكشە ءبىلىم الۋ قاجەتتىلىكتەرى بار بالالاردىڭ ءتىل دامىتۋ مامانى؛

–ەرجان ءجۇمادىلوۆ — تاراز قالاسى، دارىندى ەر بالالارعا ارنالعان «ءبىلىم يننوۆاسيا» مامانداندىرىلعان ليسەي-ينتەرناتىنىڭ فيزيكا ءپانىنىڭ ءمۇعالىمى؛

– الما ماحانوۆا — الماتى وبلىسى، جامبىل اۋدانى، قارعالى اۋىلى باستاۋىش سىنىپ ءمۇعالىمى؛

– دينا قۇدابايەۆا — قىزىلجار قالاسى، «نازاربايەۆ زياتكەرلىك مەكتەبى» فيليالىنىڭ فيزيكا ءپانىنىڭ ءمۇعالىمى؛

– ارنۋر قازىبەكوۆ — نۇر-سۇلتان قالاسى، NURORDA مەكتەپ-ليسەيىنىڭ فيزيكا ءپانىنىڭ ءمۇعالىمى؛

– مەيرامگۋل جاناسپايەۆا — سەمەي قالاسى، № 3 جالپى ورتا ءبىلىم بەرۋ مەكتەپ-كەشەنىندە ورىس ءتىلى جانە ادەبيەت ءمۇعالىمى؛

–ەلەنا ۆارگانوۆا — تەمىرتاۋ قالاسى، № 16 جالپى ورتا ءبىلىم بەرۋ مەكتەبىندە ەكولوگيا جانە ءوزىن-وزى تانۋ ءپانىنىڭ ءمۇعالىمى؛

– جانار جاقسىلىقوۆا — پاۆلودار قالاسى، № 16 مەكتەپ-ليسەيىندە باستاۋىش سىنىپ ءمۇعالىمى؛

– گۇلنار جاقىپوۆا — نۇر-سۇلتان قالاسى، «رەسپۋبليكالىق فيزيكا-ماتەماتيكا مەكتەبىنىڭ» ماتەماتيكا ءمۇعالىمى.

2019 جىلى قوعامدىق ماڭىزى بار باستامالاردى دامىتۋ قورى Global Teacher Prize جاھاندىق سىيلىعىنىڭ رەسمي وكىلى اتانىپ، 4 000 000 تەڭگە جۇلدە قورى تاعايىندالعان «قازاقستان ءمۇعالىمى» ۇلتتىق سىيلىعىن باستادى.

بايقاۋدىڭ ماقساتى – وزىق مۇعالىمدەردى انىقتاۋ، قولداۋ جانە كوتەرمەلەۋ، سونداي-اق ەلىمىزدە پەداگوگ ەڭبەگىنىڭ بەدەلىن ارتتىرۋ.

«قازاقستان ءمۇعالىمى-2020» ۇلتتىق سىيلىعىنا ەڭبەك ءوتىلى ءۇش جىلدان كەم ەمەس، كەز-كەلگەن باستاۋىش جانە ورتا ءبىلىم بەرۋ (ورتا مەكتەپتەر، گيمنازيالار، ليسەيلەر) پەداگوگتارى قاتىسۋعا مۇمكىندىك الدى.