الماتىداعى جوعارى وقۋ ورىندارىندا وتباسىلىق قۇندىلىقتىڭ ماڭىزى جونىندە ونلاين ترەنينگ وتكىزىلدى.

الماتى قالاسى قوعامدىق دامۋ باسقارماسىنىڭ قولداۋىمەن «وتباسى ينستيتۋتى» جوباسى اياسىندا الماتى قالاسىنىڭ جوعارى وقۋ ورىندارىنىڭ ستۋدەنتتەرى ءۇشىن ZOOM پلاتفورماسىندا وتباسىن قۇرۋ، وتباسى ينستيتۋتىن نىعايتۋ جانە تۇرمىستىق زورلىق-زومبىلىقتىڭ الدىن الۋ بويىنشا ونلاين دارىستەر مەن ونلاين سەمينار ترەنينگتەر ۇيىمداستىرىلدى.

«مەنىڭ بولاشاق وتباسىم»، «رەپرودۋكتيۆتى دەنساۋلىق»، «ەكونوميكا جانە وتباسىلىق بيۋدجەت» تاقىرىپتارىندا دارىستەر مەن سەمينارلاردى ءال-فارابي اتىنداعى قازۇۋ وتباسىلىق قۇندىلىقتاردى زەرتتەۋ ورتالىعىنىڭ ديرەكتورى، پسيحولوگيا عىلىمدارىنىڭ كانديداتى، دوسەنت مايرا كاباكوۆا وتكىزدى.

ونلاين سەمينار ترەنينگتەرگە ءال-فارابي اتىنداعى قازۇۋ، اباي اتىنداعى قازۇپۋ، «تۇران» ۋنيۆەرسيتەتى، «قاينار» اكادەمياسى، ت. جۇرگەنوۆ اتىنداعى قازاق ۇلتتىق اكادەمياسى، س.اسفەندياروۆ اتىنداعى مەديسينا ۋنيۆەرسيتەتى، «نارحوز» ۋنيۆەرسيتەتى، ەۋرازيالىق تەحنولوگيالىق ۋنيۆەرسيتەتىنەن 500-دەن استام ستۋدەنت قاتىستى.

«وتباسىلىق ءومىر - بۇل ۇلكەن شىعارماشىلىق جوبا! ەگەر وسى ماڭىزدى جوبا شەڭبەرىندەگى قىزمەت پەن قارىم - قاتىناس ءلاززات سىيلاسا، قۋانىش سىيلاسا، وندا ءسىز باقىتتى ادامسىز»، - دەدى قالالىق جاستار مەن وتباسىن تۇراقتى دامىتۋ ءبولىمىنىڭ باسشىسى ورىنباسار قۇدايبەرگەنوۆ.

ەستەرىڭىزگە سالا كەتەيىك، الماتى قالاسىنىڭ قوعامدىق دامۋ باسقارماسىنىڭ قولداۋ بىلدىرگەن «وتباسى ينستيتۋتى» جوباسىنىڭ ماقساتى - الماتى قالاسىندا وتباسى ينستيتۋتىن نىعايتۋ جانە تۇرمىستىق زورلىق-زومبىلىقتىڭ الدىن الۋ. الەۋمەتتىك تاپسىرىستى تىكەلەي جۇزەگە اسىرۋمەن «زور رۋح»قايىرىمدىلىق قورى اينالىسادى.

جوبا الەۋمەتتىك قورعاۋ جۇيەسىندە وتباسىلىق-باعدارلانعان ءتاسىلدى دامىتۋعا، وتباسى ينستيتۋتىن نىعايتۋعا جانە تۇرمىستىق زورلىق-زومبىلىق پروفيلاكتيكاسىنا باعىتتالعان. ونىڭ اياسىندا الماتى قالاسىندا وتباسى ينستيتۋتىن نىعايتۋعا جانە وتباسى مۇشەلەرىنە تۇرمىستىق زورلىق-زومبىلىقتىڭ الدىن الۋعا بايلانىستى پسيحولوگيالىق، قۇقىقتىق، ءبىلىم بەرۋ جانە باسقا دا ماسەلەلەر بويىنشا اقپاراتتىق-كونسۋلتاسيالىق جانە رەسۋرستىق قولداۋ كورسەتىلەدى.