قازۇۋ ستۋدەنتتەرى مەن الماتى قالاسىنىڭ ەرىكتىلەرى جاپىراقتان ۇلى ويشىل ءابۋ ناسىر ءال-فارابيدىڭ پورترەتىن جاساپ شىقتى.

ەلىمىزدىڭ جەتەكشى ۋنيۆەرسيتەتى ءال-فارابي اتىنداعى قازۇۋ-دىڭ ستاديونىندا ەرەكشە تۋىندى – ءال-فارابيدىڭ بەينەسى پايدا بولدى، بۇل كەزدەيسوقتىق ەمەس. ۋنيۆەرسيتەت الەمدە ادامزاتتىڭ ەكىنشى ۇستازى اتالاتىن ۇلى فيلوسوف ءارى عالىمنىڭ ەسىمىمەن اتالادى. بيىل يۋنەسكو قاراماعىندا ءال-فارابيدىڭ 1150 جىلدىعى حالىقارالىق دەڭگەيدە اتالىپ وتىلۋدە. جاستار بۇل كوركەم تۋىندىنى مەرەيتويلىق جىلعا ارنادى. 

"قازۇۋ شىعارماشىلىق توپقا كۇردەلى كوركەمدىك شارانى ۇيىمداستىرۋعا قولعابىس ەتتى. يدەيانى جۇزەگە اسىرۋ ءۇشىن تاڭنان كەشكە دەيىن ەكى كۇندىك دايىندىق جۇمىستارى جۇرگىزىلىپ، الماتى پاركتەرى مەن ساياباقتارىنان جينالعان بىرنەشە جۇك كولىك جاپىراقتارى جۇمسالدى. قازۇۋ ستاديونى قولدان جاسالعان بيىكتىگى 76 مەتر جانە ەنى 66 مەتردى قۇرايتىن وراسان زور ءال-فارابيدىڭ عاجايىپ پورترەتىمەن بەزەندىرىلدى. ەرەكشە شىعارماشىلىق فلەش-موبتىڭ قاتىسۋشىلارىنىڭ پىكىرىنشە بۇل ۇلى ويشىلدىڭ الەمدەگى ەڭ ۇلكەن بەينەسى. ال، ونى جاساۋعا ءال-فارابيدىڭ قازاق جەرىندە تۋىلۋى جانە ورتاعاسىرلىق ەۋروپالىق رەنەسسانسقا باستاۋ بەرگەن عۇلامانىڭ باي شىعارماشىلىق مۇراسى ەرىكتىلەرگە شابىت بەردى"، - دەلىنگەن حابارلامادا. 

ءال-فارابيدىڭ پورترەتىن جاپىراقتارمەن بەينەلەگەن – جاس سۋرەتشى دجوحار يۋنۋسوۆ، ول بەلگىلى تۇلعالاردىڭ، تاريحي قايراتكەرلەردىڭ جانە زامانداستارىمىزدىڭ بەينەلەرىن ءارتۇرلى ماتەريالداردان جانە قالىپتان تىس تۇردە جاسايدى. وعان قالانىڭ ءار ءتۇرلى ۋنيۆەرسيتەتتەرىنەن كەلگەن نيەتتەستەرى كومەكتەسەدى. جاقىندا عانا تالانتتى جاس جىگىت ۇلكەن اۆتوتۇراقتا ابايدىڭ پورترەتىن سۋمەن «بەينەلەپ»، بۇل تۋىندىسىن قازاقتىڭ ۇلى اقىنى مەن اعارتۋشىسىنىڭ 175 جىلدىعىنا ارنادى. 

ۇشار بيىكتەن ءال-فارابيدىڭ پورترەتى تەك ءوزىنىڭ كولەمىمەن تاڭعالدىرىپ قانا قويماي، سونىمەن بىرگە ويشىلدىڭ كوزقاراسىنان بەينە ءبىر وزدەرىنىڭ وتانداسىن جادىندا ساقتاپ، ونىڭ قايىرىمدىلىق، بىرلىك جانە ءوزارا كومەك كورسەتۋ تۋرالى باعا جەتپەس يدەيالارىن قولدانىپ كەلە جاتقان ءوز تۋعان جەرىندەگى وتانداستارىنا دەگەن ريزاشىلىقتى اڭعارۋعا بولادى.