ۇلى اقىن، ويشىل اباي قۇنانباي ۇلىنىڭ 175 جىلدىعىنا وراي «ولەڭ – ءسوزدىڭ پاتشاسى...» اتتى رەسپۋبليكالىق جاس اقىندار ايتىسى ءوتتى. قازاق ۇلتتىق قىزدار پەداگوگيكالىق ۋنيۆەرسيتەتىنىڭ مۇرىندىق بولۋىمەن ۇيىمداستىرىلعان جىر بايگەسىنە جوعارى وقۋ ورىندارىنىڭ ستۋدەنتتەرى قاتىسىپ، باقتارى مەن باپتارىن سىنادى.

وسكەلەڭ ۇرپاقتى وتانسۇيگىشتىككە تاربيەلەپ، ولاردىڭ تانىم-تالعامىن ۇلت رۋحانياتىنا باعىتتاۋدى كوزدەيتىن ءسوز زەرگەرلەرى سايىسىنىڭ العاشقى اينالىمىنا 14 ادام قاتىسىپ، اقتىق كەزەڭگە 4 ستۋدەنت جولداما الدى. ولاردىڭ قاتارىندا ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى نۇربول جاۋىنبايەۆ، س. امانجولوۆ اتىنداعى شىعىس قازاقستان ۋنيۆەرسيتەتىنىڭ ستۋدەنتى ارداق ادالبەك، س. بايىشيەۆ اتىنداعى اقتوبە ۋنيۆەرسيتەتىنىڭ ستۋدەنتى زليحا ناۋرىزالينا جانە ح. دوسمۇحامەدوۆ اتىنداعى اتىراۋ ۋنيۆەرسيتەتىنىڭ ستۋدەنتى جاسار نۇردانبەك ۇلى بار.

"بيىل ۇلى اقىن، دالا كەمەڭگەرى اباي قۇنانباي ۇلىنىڭ 175 جىلدىعى ەلىمىزدە كەڭىنەن اتالىپ وتىلۋدە. ابايعا بەت بۇرۋ، «وتكەننىڭ ارتى، جاڭانىڭ باسى ەدىم» دەگەن ۇلى اقىننىڭ تاعىلىمىنا تەرەڭ بويلاۋ – بۇگىنگى كۇندە ۇلكەن ماڭىزعا يە. اباي – ۇلتتىق بولمىستىڭ ايقىن ۇلگىسى. اباي – دالا دانالارىنىڭ بارشا جاقسى قاسيەتتەرى مەن اسىل مۇرالارىن بويىنا سىڭىرە وتىرىپ، ۇلت ادەبيەتى مەن مادەنيەتىن باعا جەتپەس قازىنالارمەن بايىتقان دانا دا دارا تۇلعا. اباي – ادامزاتقا ورتاق كەمەڭگەر. ۇلى ويشىلدىڭ شىعارمالارىنىڭ 30-دان استام تىلگە اۋدارىلىپ، ومىرشەڭ ولەڭدەرى مەن ءپالساپالىق ويلارى الەمدىك ادەبيەتتىڭ التىن قورىنا ەنۋى بۇل سوزىمىزگە ايقىن دالەل"، – دەدى قىزدار ۋنيۆەرسيتەتىنىڭ رەكتورى گاۋحار الدامبەرگەنوۆا.

ۋنيۆەرسيتەت باسشىسى كەمەڭگەردىڭ تويى ويدىڭ تويى بولۋى قاجەت ەكەندىگىن اتاپ ءوتتى.

"كەمەڭگەردىڭ تويى ويدىڭ تويى بولۋى قاجەت. ۇلى ابايدىڭ تويى تاعىلىمنىڭ تويى بولۋى ءتيىس. وسىعان وراي قىزدار ۋنيۆەرسيتەتىنىڭ دانىشپاننىڭ مەرەيتويىنا وراي رەسپۋبليكالىق جاس اقىندار ايتىسىن وتكىزۋدى ۇيعاردى. باستى ماقسات – جاستاردىڭ ورنەكتى سوزدەرى مەن ورەلى ونەرى ارقىلى ەل مۇراتى مەن قۇندىلىقتارىن ناسيحاتتاۋ. كەلىستى دە كەستەلى ءسوزدى جانىنا سەرىك ەتكەن الامانعا قاتىسۋشىلارعا تابىس جانە جەڭىس تىلەيمىن! كەمەلدىك كىلتىن ۇسىنعان اباي مۇراسى جاڭعىرا بەرسىن"، – دەدى ءوز سوزىندە گاۋحار تورەمۇرات قىزى.

ايتىس بارىسىندا اقىندار «اباي – دانا، اباي – دارا»، «رۋحاني جاڭعىرۋ – باستى باعدار»، «تۋعان جەر – تۇرعان جەرمەن ولشەنبەيدى»، «انا ءتىلىم – ارداعىم»، «تاۋەلسىزدىك – تۇعىرىم» تاقىرىپتارى بويىنشا ءسوز جارىستىردى.

ۇلتتىڭ ۇلىلىعىن ۇلىقتاپ، ءتول مادەنيەتىمىزدىڭ مەرەيىن ارتتىرۋعا سەپ بولعان ءسوز سايىسىندا نۇربول جاۋىنبايەۆ ۇزدىك اتانىپ، بايقاۋدىڭ باس جۇلدەسىن قانجىعاسىنا بايلادى. ءبىرىنشى ورىن جاسار نۇردانبەكۇلىنا بەرىلسە، ەكىنشى ورىن زليحا ناۋرىزاليناعا بۇيىردى. ال جۇلدەلى ءۇشىنشى ورىنعا ارداق ادالبەك لايىق دەپ تانىلدى.

جەڭىمپازدار مەن جۇلدەگەرلەر قىزدار ۋنيۆەرسيتەتىنىڭ رەكتورى گاۋحار الدامبەرگەنوۆانىڭ «العىس حاتىمەن»، ارنايى ديپلومدارمەن جانە «اتامۇرا» كورپوراسياسىنىڭ پرەزيدەنتى راقىمعالي قۇل-مۇحامەد پەن «Tasgroup» كومپانياسىنىڭ باسقارۋشىسى دۋلات تاستەكەيەۆ تاعايىنداعان سىياقىلارىمەن ماراپاتتالدى.

الامان ايتىسقا قاتىسۋشىلاردىڭ ونەرىن تالانت ارىنعالي، سايات قامشىگەر، ءلاززات يگىسىن سىندى تانىمال اقىندار باعالاپ، جىر دوداسىنا قازىلىق جاسادى.

وسى ورايدا ايتا كەتەيىك، ونەر سايىسىنىڭ جوعارى دەڭگەيدە وتۋىنە قىزدار ۋنيۆەرسيتەتىنىڭ فيلولوگيا ينستيتۋتىنىڭ قوسقان ۇلەسى مول. ينستيتۋت ديرەكتورى تىنىشتىق ەرمەكوۆانىڭ ايتۋىنشا، حاكىم مەرەيتويىنا ارنالعان ونەر جارىسىنىڭ ماقساتى – اباي مۇرالارى ارقىلى ۇلت ادەبيەتىنىڭ تابىستارىن جانە تاۋەلسىزدىك جىلدارى قول جەتكەن جەتىستىكتەردى دارىپتەۋ.