ازاماتتىق بەلسەندىلەر مەن ءبىرقاتار زاڭگەرلەر قازاقستاندا جىنىستىق بوپسالاۋعا زاڭ جۇزىندە تىيىم سالۋدى تالاپ ەتۋدە. ولار ەلدەگى ماسەلەگە نازار اۋدارۋعا شاقىرىپ، پرەزيدەنت قاسىم-جومارت توقايەۆتىڭ اتىنا "قازاقستاندا جىنىستىق بوپسالاۋعا زاڭ جۇزىندە تىيىم سالۋ تۋرالى" پەتيسيا جولدادى، دەپ حابارلايدى Qamshy.kz اقپارات اگەنتتىگى "قۇقىقتىق ساياساتتى زەرتتەۋ ورتالىعىنىڭ" باسپا ءسوز قىزمەتىنە سىلتەمە جاساپ. 

بەلسەندىلەردىڭ پىكىرىنشە، جىنىستىق بوپسالاۋعا قاتاڭ دا ناقتى جازا بەكىتپەسە، قۇرباندار سانى كوبەيەدى. بوپسالاۋ سالدارى زورلىققا، ءتىپتى ادام ولىمىنە اكەلۋى مۇمكىن. مامانداردىڭ ەسەبىنشە، ءتيىستى زاڭنىڭ جوقتىعىنان جۇمىستا، قوعامدىق ورىنداردا ءزابىر كورىپ، زورلىق كورگەندەر قاتارى سوڭعى جىلدارى ارتا تۇسكەن. ءبىراق ول تۋرالى كوبى ءتىس جارمايدى. جىنىستىق بوپسالاۋ بويىنشا ەلدە 20 جىلدا 87 ءىس تىركەلگەن. الايدا بىردە-بىر ايىپتالۋشى باس بوستاندىعىنان ايىرىلماعان. ويتكەنى ءزابىر كورۋشىنىڭ قۇقىعىن قورعايتىن ارنايى زاڭ جوق.

پەتيسيا ماتىنىندە "ءبىز، قازاقستان ازاماتتارى، ءسىزدى ەلدەگى جىنىستىق بوپسالاۋ ماسەلەسىنە نازار اۋدارۋعا شاقىرامىز! ءبىز قوعام رەتىندە بۇدان بىلاي ازاماتتارىمىزدىڭ ءوز قاۋىپسىزدىگىنە قول سۇعۋشىلىقتان زارداپ شەگەتىنىنە، بالالار مەن ەرەسەكتەر بوپسالاۋدىڭ قۇربانىنا اينالاتىنىنا جانە اگرەسسورلار زاڭمەن قاتاڭ جازالانبايتىنىنا بەي-جاي قاراي المايمىز. جىنىستىق بوپسالاۋ سەبەبىنەن ادامنىڭ پسيحيكالىق دەنساۋلىعى ناشارلاپ، ۇيقىسى بۇزىلىپ دەپرەسسياعا تۇسەدى. جىنىستىق بوپسالاۋ سوڭى وز-وزىنە قول جۇمساۋعا سەبەپ بولۋى مۇمكىن. ءبىز ءار ادامنىڭ ار-نامىسى مەن قادىر-قاسيەتىنە قول سۇعىلمايتىن، زورلىق-زومبىلىق جاسالمايتىن ەلدە ءومىر سۇرگىمىز كەلەدى!" دەلىنگەن.

– قازاقستاندا جىنىستىق بوپسالاۋ ۇعىمى بۇرمالانعان. جاڭا زاڭ جوباسىندا، ەڭ الدىمەن، ءبىز دۇرىس تەرمينولوگيانى، حاراسسمەنتتىڭ دۇرىس جانە سالماقتى تۇسىنىگىن كورەمىز. بۇل رەفورما جاسى، جىنىسى مەن ۇلتى، الەۋمەتتىك جاعدايىنا قاراماستان كەز كەلگەن ادامنىڭ جەكە ومىرىنە قول سۇعۋشىلىقتىڭ الدىن الادى. كەي جاعدايدا زورلاۋ نەمەسە كىسى ءولتىرۋدىڭ الدىن الۋى مۇمكىن، – دەيدى "قۇقىقتىق ساياساتتى زەرتتەۋ ورتالىعى" قق باعدارلامالارىنىڭ ۇيلەستىرۋشىسى اياجان ويراتوۆا.

ەسكە سالا كەتەيىك، ءقازىر قازاقستاندا جىنىستىق بوپسالاۋ ءۇشىن قىلمىستىق جازا ەنگىزۋ تۋرالى زاڭ جوباسى  قاراستىرىلۋدا.

پەتيسيا اۆتورلارى ءبىلىم بەرۋ جانە مەديسينالىق مەكەمەلەردە جىنىستىق بوپسالاعانى ءۇشىن سوتتالعان ادامداردىڭ ءتىزىمىن قۇرۋدى ۇسىنىپ وتىر. سونداي-اق كامەلەتكە تولماعانداردى جىنىستىق بوپسالاعانداردى، اتا-انالارى مەن زاڭدى وكىلدەرىن قاتاڭ جازالاۋدى تالاپ ەتۋدە. جۇمىس ورنىنداعى جىنىستىق بوپسالاۋعا قاتىستى جۇمىس بەرۋشىلەرگە ىشكى ساياساتىن ازىرلەپ، ەڭبەك كودەكسىنە سايكەس ەرەجەلەر ەنگىزۋدى ۇسىندى.

پەتيسياعا قول قويۋ ءۇشىن https://otinish.kz/ru/petition/40  سايتىنا ءوتىڭىز.