ءابىلحان قاستەيەۆ اتىنداعى ونەر مۋزەيىندە «اباي – حالىق دانالىعى. اباي بەينەسى – قازاقستان سۋرەتشىلەرىنىڭ كوزىمەن» اتتى كورمە اشىلدى. بۇل تۋرالى اlmaty.tv حابارلادى.

كورمەگە مۋزەي قورىنان 70-تەن استام اباي بەينەسى مەن شىعارماشىلىعىنا ارنالعان ءار كەزەڭدەگى سۋرەتشىلەردىڭ ءتۇرلى جانرداعى تۋىندىلارى قويىلدى. جالپى وتاندىق سۋرەتشىلەر ابايدىڭ بەينەسىن قىلقالامعا 1930 جىلداردان بەرى ارقاۋ ەتە باستاعان. ونەرتانۋشى گۇلجازيرا مۇقاجانوۆانىڭ سوزىنشە، اقىننىڭ بەينەسىن 1934 جىلى العاش بولىپ ءابىلحان قاستەيەۆ بەينەلەگەن. سۋرەتشى ابايدىڭ كيىز ءۇي قاسىندا وتىرعان كورىنىسىن سالادى. ال 1945 جىلى قاستەيەۆ اكۆارەلدىڭ كومەگىمەن كىتاپ ۇستاعان بالا ابايدى سۋرەتتەيدى.

"ارينە، ول كەزدەگى سۋرەتشىلەر جازۋشىنىڭ وبرازىن قالىپتاستىرۋعا ۇلكەن كۇش سالدى. تەرەڭ ويعا باتقان فيلوسوفتىڭ، ويشىلدىڭ كەلبەتىن، وبرازىن جاساۋ وڭاي بولمادى. ويتكەنى ابايدىڭ ەكى ۇلىمەن تۇسكەن جالعىز عانا شىنايى سۋرەتى بولدى. سۋرەتشىلەردىڭ الدىندا اقىندى ءار قىرىنان كورسەتۋ مىندەتى تۇرعان بولاتىن"، – دەدى  ءا. قاستەيەۆ اتىنداعى ق ر مەملەكەتتىك ونەر مۋزەيىنىڭ ءبولىم باسشىسى گۇلجازيرا مۇقاجانوۆا.

سونداي-اق، مۋزەي قابىرعالارىنا ابايدىڭ جيناق كىتاپتارىنا ارنالعان يلليۋستراسيالار توپتاماسىن جاساعان سۋرەتشىلەردىڭ دە تۋىندىلارى ىلىنگەن. ودان بولەك زاماناۋي شەبەرلەردىڭ ەڭبەكتەرى ۇسىنىلىپتى. ماسەلەن، بەلگىلى سۋرەتشى تابىلدى مۇقاتوۆ ابايدىڭ ءتورت مەزگىلدى جىرلاعان ولەڭدەرىن سۋرەت ەتىپ كەنەپ بەتىنە تۇسىرگەن.

"ءىلىنىپ تۇرعان بۇل كارتينالاردى مەن ابايدىڭ 175 جىلدىعىنا ارنادىم. بۇل سۋرەتتەردى بيىل سالىپ شىقتىم.  جازعىتۇرى، جاز، قىس، كۇز دەگەن ءتورت مەزگىلگە ارناپ شىعارعان ولەڭدەرىنىڭ جەلىسىن مايلى بوياۋمەن بەينەلەدىم"، – دەدى سۋرەتشى، ق ر سۋرەتشىلەر وداعىنىڭ مۇشەسى تابىلدى مۇقاتوۆ.

قىلقالام شەبەرلەرى اقىننىڭ وتىرعان، قولىنا كىتاپ ۇستاعان كەيدە شابىت ۇستىندەگى كەيپىن بەينەلەۋگە تىرىسقان. كورمەدە ويشىلدىڭ ءومىر جولى عانا ەمەس 19-عاسىرداعى حالىقتىڭ مىنەزى مەن تۇرمىس-تىرشىلىگى، كوشپەلى جانە وتىرىقشى دالانىڭ كورىنىستەرى سۋرەتتەلەدى. ابايدىڭ مۇنداي سان قىرلى وبرازىن مۋزەي كەلۋشىلەرى جاڭا جىلعا دەيىن تاماشالاي الادى.