تاۋەلسىزدىك كۇنى قارساڭىندا «Qazaqstan» ۇلتتىق تەلەارناسىنان «اباي» جانە «ءال-فارابي» سەريالدارى ەفيرگە شىعادى. بۇل تۋرالى بۇگىن «Astanا Media Week-2020» اپتالىعىندا «قازاقستان» رەسپۋبليكالىق تەلەراديوكورپوراسياسىنىڭ باسقارما ءتورايىمى ءلاززات تانىسباي مالىمدەدى.

پاندەميا كەزىندەگى وتاندىق بۇقارالىق اقپارات قۇرالدارىنىڭ قىزمەتىن تالقىلاۋعا ارنالعان الاڭ جۇمىسىنا وتاندىق جانە شەتەلدىك توپ-مەنەدجەرلەر، جەتەكشى مەديا اگەنتتىكتەردىڭ ساراپشىلارى، ءىرى حالىقارالىق ۇيىمدار مەن شەتەلدىك جوعارعى وقۋ ورىندارىنىڭ عالىمدارى، مەملەكەتتىك سەكتور مەن پروداكشن-كومپانيالاردىڭ وكىلدەرى قاتىسۋدا. 

"پاندەميا كورپوراسيانىڭ تەلەسەريالدار وندىرىسىنە كەدەرگى بولعانىمەن، ءوندىرىس تولىقتاي توقتاپ قالعان جوق. ەلىمىزگە ىندەت ءالى جەتە قويماعان تۇستا ۇلى ابايدىڭ 175 جىلدىعىنا ارنالعان «اباي» سەريالىنىڭ، ءال-فارابيدىڭ 1150 جىلدىعى قارساڭىندا جوسپارلانعان «ءال-فارابي» تەلەحيكاياسىنىڭ ءتۇسىرىلىم جۇمىستارى باستالىپ كەتكەن بولاتىن. ەلىمىزدىڭ ءار ايماعىندا جۇرگىزىلگەن ءتۇسىرىلىم جۇمىستارى توتەنشە جاعدايعا بايلانىستى ءسال كەشەۋىلدەدى، دەسە دە، اياقتاپ ۇلگەردىك. قوس تاريحي تۋىندى ەفيرگە تاۋەلسىزدىك مەرەكەسىندە شىعادى"، - دەپ اتاپ ءوتتى باسقارما ءتورايىمى. 

سونىمەن قاتار، ۇلتتىق ارنا ەگەمەندىكتىڭ 30 جىلدىعىنا ارنالعان 100 بولىمنەن تۇراتىن «زامانداستار» ، حالىق جازۋشىسى ءا.نۇرشايىقوۆتىڭ رومانى جەلىسى بويىنشا تۇسىرىلگەن «ماحاببات، قىزىق مول جىلدار» تەلەحيكايالارىن ۇسىنباق. 

ءلاززات تانىسباي وسى رەتتە «قازاقستان» تەلەراديوكورپوراسياسى تۇسىرگەن وتاندىق فيلمدەرگە شەتەلدىك نارىقتان قىزىعۋشىلىق جوعارى ەكەنىن جەتكىزدى.  

بيىل «Qazaqstan» جانە «Balapan» تەلەارناسىنىڭ سەريالدارى اقش، لاتىن امەريكاسى ەلدەرىندە اعىلشىن، يسپان جانە پورتۋگال تىلدەرىندە كورسەتىلمەك. كەلىسىمشارت اقش-تىڭ جەلىلىك جانە سپۋتنيكتىك حابار تاراتۋ قىزمەتىن جۇزەگە اسىراتىن «Olympusat» كومپانياسىمەن جاسالعان. ساتىلعان ونىمدەر تىزىمىندە «عازيز جۇرەك»، «ورالۋ»، «قاشقىن»، «جاڭعىرىق»، «47 بالانىڭ اناسى»، «شىراعىم» تەلەحيكايالارى مەن «Balapan» تەلەارناسىنىڭ «تىنىمسىز شوجەلەر»، «ءسابي»، «ەركەلەر»، «شاحمات پاتشالىعى»، «پىراقتار» انيماسيالىق جوبالارى بار. 

ودان بولەك، جالپى سانى 242 بولىمنەن تۇراتىن سەريال مەن انيماسيالىق جوبا تمد-داعى ەڭ ۇزدىك ونلاين-كينوتەاتر سانالاتىن IVI.RU پلاتفورماسى ارقىلى تارالماق.  

«Qazaqstan» ارناسى تەلەكورەرمەنگە بيىلعى جىلى جالپى سانى 300-گە جۋىق سەريادان تۇراتىن 13 وتاندىق تەلەحيكايا ۇسىنادى.