كسرو حالىق ءارتىسى ءاسانالى ءاشىموۆتىڭ جەتەكشىلىگىندەگى «جاڭا عاسىر» تەاترى جاڭا ماۋسىمنىڭ شىمىلدىعىن ءتۇردى.  ونەر ۇجىمى كورەرمەن نازارىنا مۇحتار اۋەزوۆتىڭ «قاراگوز» دراماسىن ۇسىندى. سالتاناتتى كەشتە ەلىمىزدىڭ زيالى قاۋىمى، قازاقستاندىق تەاتر جانە كينو سالاسىنىڭ ۇلكەنى مەن كىشىسى جينالدى. پاك ماحاببات پەن ادالدىقتى دارىپتەيتىن قويىلىمدى Almaty.tv ءتىلشىسى سىمبات نوعاي دا تاماشالاپ قايتتى.

ەلدەگى كارانتيندىك احۋالعا بايلانىستى ايلار بويى جۇمىسىن توقتاتۋعا ءماجبۇر بولعان ونەر ۇجىمى كورەرمەنمەن قايتا قاۋىشىپ وتىر. ساحنا ساڭلاقتارى تولىقتاي ءاسانالى ءاشىموۆتىڭ شەبەرxاناسىندا تاربيەلەنگەن شاكىرتتەر. ۇلاعاتتى ۇستاز وزىنەن ونەگە العان اكتەرلەردىڭ ونەرگە جول تارتىپ، ءوز كورەرمەنىن تاپقانىنا ءدان ريزا.

«الدەرىنشە سول بارلىق تاپسىرمانى ورىنداپ شىقتى دەپ ويلايمىن. كورەرمەن قاۋىمعا جەتىپ جاتسا، سول ءبىزدىڭ قۋانىشىمىز، جەڭىسىمىز دە سول بولادى. بالالاردىڭ رەپەرتۋارى جاقسى»، – دەدى كسرو حالىق ءارتىسى، تەاتر جانە كينو اكتەرى ءاسانالى ءاشىموۆ.

«قاراگوز» شىعارماسى ءالى كۇنگە دەيىن ءوزىنىڭ قۇندىلىعىن جويعان جوق دەيدى اكتەرلەر. دراماتۋرگ باستى كەيىپكەر ارقىلى سول داۋىردەگى قازاق قىزدارىنىڭ باسىنداعى جاعدايدى اشىق كورسەتكەن.

ساحنادا باعزى زامانداعى قازاق حالقىنىڭ ءومىرى، ءداستۇرى، دۇنيەتانىمى مەن ادەت-عۇرپى سۋرەتتەلدى. وقيعا سۇيگەنىنە قوسىلۋدى اڭساعان جاستارعا رۋلىق سالت-سانا قارسى تۇرىپ، باستى كەيىپكەردىڭ مەرت بولۋىمەن اياقتالادى.

«بۇكىل ماحاببات شىعارمالارىن الىپ قارايتىن بولساق تا، "قاراگوز" وتە ەرەك. بۇل جەردە ماحابباتتان بولەك، ءداستۇر تۇر، سالت تۇر جانە قازاقيلىق تۇر جانە ارادا سول 7 اتا تۇر. سول جەتى اتاعا قارسى شىققان سىرىم سالدىڭ وقيعاسى. ءوز كەيىپكەرىمدى ءبىر جاعىنان اقتاپ شىعا الامىن جانە دە داتتاي الامىن. ويتكەنى بۇل كەيىپكەر – وزىندىك شىندىعى بار كەيىپكەر»، – دەدى «جاڭا عاسىر» تەاترىنىڭ اكتەرى قۋانىش قۇدايبەرگەن.

مۇحتار اۋەزوۆتىڭ ءبىر عاسىرداي بۇرىن جازىلعان «قاراگوز» پەساسى وتاندىق تەاتر ساحنالارىنان ءالى كۇنگە دەيىن تۇسپەي كەلەدى. كەزىندە باستى كەيىپكەرلەردىڭ ءبىرىن سومداعان اكتەر ازامات ساتىبالدى ونەر ۇجىمىنىڭ ويىنىنا جوعارى باعا بەردى.

«بۇل سپەكتاكلدىڭ وزىندىك ءبىر ەرەكشەلىگى كىلەڭ جاستار وينايدى. تازالىق بار ساحنادا. شىنايىلىق بار. ماعان وتە قاتتى اسەر ەتتى. جالپى بۇل «قاراگوز» سپەكتاكلىن قانشاما كوردىم مەن بىرەۋىنىڭ جامان شىققانىن كورگەن ەمەسپىن. ءبارى جاقسى. ونىڭ ۇستىنە مەن نارشانى ويناعانمىن اۋەزوۆ تەاترىندا بولات اتابايەۆ قويعان كەزدە. قاراپ وتىردىم، قىزىعىپ وتىردىم. نارشانى جىگىت وتە جاقسى ويناعان»، – دەدى  ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىنىڭ ديرەكتورى ازامات ساتىبالدى.

تەاتردا كارانتيندىك شارالاردا نازاردان تىس قالعان جوق. كىرەبەرىستەردە قوناقتاردىڭ قىزۋى ولشەنىپ، ورىندىقتار 2 مەتر اراقاشىقتىقتا قويىلدى. زال ىشىندە بارى 50 كورەرمەن وتىردى.