قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترى مەن عابيت مۇسىرەپوۆ اتىنداعى بالالار جانە جاسوسپىرىمدەر تەاترىنىڭ بىرلەسكەن «ابايدان امانات» كونسەرت-سپەكتاكلىنىڭ ءتۇسىرىلىمى باستالدى.

قازاقتىڭ ويشىلى اباي قۇنانبايەۆتىڭ 175 جىلدىعىنا وراي ۇيىمداستىرىلعان شاراعا مادەنيەت جانە سپورت مينيسترلىگى قولداۋ ءبىلدىرىپ وتىر. تىڭ جوبادا اكتەرلەردىڭ قويىلىمى وركەستر مۋزىكاسىمەن سۇيەمەلدەنىپ، كورەرمەنگە اقىننىڭ تاعدىرىنا شىنايى تۇردە ۇڭىلۋگە مۇمكىندىك بەرەدى.

«ابايدان امانات» ابايدىڭ بالا كەزىنەن ۇلكەيگەن شاعىنا دەيىنگى قويىلىمداردىڭ بارلىعى وسى جەردە قويىلادى. قۇرمانعازى وركەسترىنىڭ سۇيەمەلدەۋىمەن جانە عابيت مۇسىرەپوۆ اتىنداعى تەاتردىڭ اكتەرلارى ويناۋىمەنەن ەكى مەكەمەنىڭ بىرلەسكەن شاراسى. بۇل ەندى تەليەۆيزيالىق جوبا بولعان سوڭ، جۋىردا اباي تەلەارناسىنان كورسەتىلەتىن بولادى»، – دەدى قۇرمانعازى اتىنداعى قازاق مەملەكەتتىك اكادەميالىق حالىق اسپاپتار وركەسترىنىڭ ديرەكتورى مەدەت قۋانىشيەۆ.

كونسەرت-سپەكتاكلدە ابايدىڭ بالا كەزى، العاشقى ماحابباتى توعجانعا عاشىق بولۋى، سونداي-اق ءبىرجان سالمەن كەزدەسۋى سياقتى اقىننىڭ ومىرىنەن ۇزىندىلەر كورسەتىلەدى. ۇلى سازگەردىڭ اندەرى مەن قارا سوزدەرىنە دە باسا نازار قويىلعان. قويىلىمدا «ايتتىم سالەم قالامقاس»، «كوزىمنىڭ قاراسى»، «جەلسىز تۇندە جارىق اي» اندەرى شىرقالىپ، قورقىت پەن قۇرمانعازىنىڭ كۇيلەرى تارتىلدى.

«بۇل جەردە بالانىڭ كوزقاراسىمەن، بالا جاڭاعى قيال-عاجايىپقا ەنىپ كەتكەن كەزدە جاس ابايدىڭ ءبىز شابىتتانعان كەزىن كورسەتەمىز. ونىڭ توعجانعا عاشىق بولۋى، ونىمەن كەزدەسۋى جانە وعان ءان ارناۋى. بۇنىڭ بارلىعى رەجيسسەردەن، مەنەن شىققان فانتازيا. ودان كەيىن اجەسى زەرەگە ەركەلەۋى، ونى قالاي جاقسى كورەتىندىگى، اجەسىنىڭ نەمەرەسىنە دەگەن ماحابباتى كورسەتىلەدى»، – دەدى عابيت مۇسىرەپوۆ اتىنداعى بالالار جانە جاسوسپىرىمدەر تەاترىنىڭ كوركەمدىك جەتەكشىسى، جوبانىڭ رەجيسسەرى دانيار بازارقۇلوۆ.