بەلگىلى جازۋشى ءانۋار ءالىمجانوۆتىڭ تۋعانىنا 90 جىل تولۋىنا وراي الماتى وبلىسىندا مەملەكەت جانە قوعام قايراتكەرىنىڭ مەرەيتويىنا ارنالعان مادەني ءىس-شارا ءوتتى.

جەتىسۋ ءتورى – تالدىقورعاندا عىلىمي-تاجىريبەلىك كونفەرەنسيا ۇيىمداستىرىلىپ، «ءانۋار 90» كىتابىنىڭ تۇساۋى كەسىلدى. جازۋشى ءوزىنىڭ سانالى عۇمىرىنىڭ ءبىر بولىگىن ماحامبەتتى زەرتتەۋگە ارناعان. ءوزىنىڭ ءار تۋىندىسىمەن وقىرمان ساناسىنان ويىپ تۇرىپ ورىن العان، ارتىنان وشپەس مۇرا قالدىرعان قالامگەر تۋراسىندا Almaty.tv ءتىلشىسىنىڭ بەينەماتەريالدا.  

الماتى وبلىسىنىڭ الاكول اۋدانىنداعى قارلىعاش اۋىلىندا دۇنيەگە كەلگەن ءانۋار ءالىمجانوۆ 1954 جىلى قازاق مەملەكەتتىك ۋنيۆەرسيتەتىنىڭ جۋرناليستيكا فاكۋلتەتىن ءتامامداپ، 1952 جىلى العاشقى اڭگىمەلەرىن، وچەركتەرىن، پۋبليسيستيكالىق ماقالالارىن باسپا ءسوز بەتىنە جاريالاي باستايدى. جازۋشى ارتىندا «وتىراردىڭ كۇيرەۋى»، «ماحامبەتتىڭ جەبەسى» سىندى تۋىندىلارى قالدى. قابىرعالى قالامگەردىڭ تاعى ءبىر سۇبەلى ەڭبەگى – «ۇستازدىڭ ورالۋى» اتتى رومانى. جازۋشى وسى تۋىندىسى ارقىلى ءال-فارابيدىڭ قازاق دالاسىنان شىققان ۇلى ويشىل ەكەنىن دالەلدەي ءبىلدى.

«ءال-فارابيدىڭ قايتىپ ورالۋىنا ەڭبەك سىڭىرگەن ەكى قازاق بولسا، بىرەۋى – ماشانوۆ اقجان اقساقال، ەكىنشىسى ءبىزدىڭ ءانۋار ءالىمجانوۆ. بۇكىل الەم ادەبيەت قاۋىمىنىڭ كوزىن قازاقستانعا بۇرىپ كەلگەن ادام – ءانۋار ءالىمجانوۆ. سول سەبەپتى بۇل كىسىنىڭ بۇكىل ەڭبەكتەرى ۇرپاقتارىنىڭ جادىندا بولۋى كەرەك. ۇرپاقتار ول كىسىنى ءبىلۋى كەرەك جانە شىعارمالارىن وقىپ ءوسۋى كەرەك دەپ ايتار ەدىم»، – دەدى ق ر جازۋشىلار وداعىنىڭ ءتوراعاسى ۇلىقبەك ەسداۋلەت.

جيىندا ءانۋار ءالىمجانوۆتىڭ 90 جىلدىق مەرەيتويىنا وراي شىعارىلعان تۋىندىنىڭ تۇساۋى كەسىلدى. جيناقتىڭ قۇراستىرۋشى اۆتورى، جازۋشى – عابباس قابىش ۇلى. ەكى تىلدە جازىلعان ەڭبەكتىڭ العاشقى بولىمىنە ەستەلىكتەر ەنسە، ەكىنشى ءبولىمى جازۋشىنىڭ ءومىرى مەن شىعارماشىلىعىنا ارنالعان. ال كىتاپتىڭ سوڭعى ءبولىمى قىزمەتتەستەرى مەن شەتەلدىك عالىمداردىڭ قالامگەرگە جازعان حاتتارىمەن تولىقتىرىلدى.

«كورنەكتى قالامگەر، جازۋشى ءانۋار ءالىمجانوۆتىڭ ەسىمى تاريح بەتتەرىندە وراسان زور ەڭبەكتەرىمەن، كوركەم دۇنيەلەرىمەن قالارى ءسوزسىز. جەتىسۋدىڭ ادەبيەت ايدىنىنان جازۋشى مۇراسىن جالعاستىراتىن تالانتتى جاستارىمىزدىڭ قاتارى كوبەيە بەرسىن»، – دەدى وبلىس اكىمىنىڭ ورىنباسارى رۋستام ءالي.

وبلىستىق مادەنيەت باسقارماسى مۇرىندىق بولعان جيىنعا ەلگە تانىمال ازاماتتار مەن زيالى قاۋىم وكىلدەرى قاتىسىپ، ءانۋار ءالىمجانوۆتىڭ ءومىر جولىنان سىر شەرتتى. جيىندا قوعام قايراتكەرىنە ارناپ ەڭسەلى ەسكەرتكىش بوي كوتەرسە دەگەن ۇسىنىس تا جاسالدى.

«مەن الماتى وبلىسىنىڭ اكىمدىگىنە جانە الاكول اۋدانىنىڭ اكىمدىگىنە ۇلكەن العىس ايتام. كونفەرەنسيانى وتە جوعارى دەڭگەيدە ۇيىمداستىرعانى ءۇشىن. بارلىق قاتىسۋشى جازۋشى مۇراسى تۋرالى قىزىقتى دەرەكتەرىن ورتاعا سالدى. وقىعان باياندامالارى دا، جاساعان ۇسىنىستارى دا ورىندى دەپ ويلايمىن»، – دەدى ءا. ءالىمجانوۆتىڭ قىزى دينارا ءالىمجانوۆا.

ءانۋار ءالىمجانوۆتىڭ تاريحي روماندارى مەن اڭگىمەلەرى الەمنىڭ بىرنەشە تىلىنە اۋدارىلعان. جازۋشى ءومىرىنىڭ سوڭعى جىلدارى «قۇرمەت بەلگىسى»، «حالىقتار دوستىعى» وردەندەرىمەن ماراپاتتالدى.  ءانۋار ءالىمجانوۆتىڭ ورنى كوزى تىرىسىندە دە وقشاۋ ەدى. ءقازىر ءتىپتى ويسىراپ تۇر. مەملەكەت جانە قوعام قايراتكەرى ونەگەلى سوزىمەن دە، ناقتى ىسىمەن دە تۋعان حالقىنا جان اياماي قىزمەت ەتتى. بۇگىندە ونىڭ كوسەمسوزىن ەلى-جۇرتى ىزدەۋدە، ءبىتىمى بولەك ءۇنىن ساعىنا ەسكە الۋدا.