الماتىنىڭ سيفرلىق ينفراقۇرىلىمىنىڭ دامۋى تۋرالى وڭىرلىك كوممۋنيكاسيالار قىزمەتى الاڭىندا وتكەن ونلاين-بريفينگ بارىسىندا قالانىڭ سيفرلاندىرۋ باسقارماسىنىڭ باسشىسى بايان قوڭىربايەۆ ايتتى.

سپيكەردىڭ ايتۋىنشا، قازىرگى ۋاقىتتا «ەلەكتروندىق ۇكىمەتتىڭ» سەرۆيستىك ينتەگراتورى «زەردە» حولدينگىمەن بىرلەسىپ الماتى اكىمدىگىنىڭ ات-ارحيتەكتۋراسىن ازىرلەۋدە. وسى ماقساتتا اقپاراتتىق جۇيەلەردى تۇگەندەۋ، اعىمداعى احۋالدى تالداۋ جۇرگىزىلدى جانە ودان ءارى دامۋ باسىمدىقتارى ايقىندالدى.

«2020 جىلدىڭ 1 جارتىجىلدىعىنىڭ قورىتىندىسى بويىنشا الماتى قالاسى ەلىمىزدىڭ بارلىق وڭىرلەرى اراسىندا „اقىلدى“ قالالار رەيتينگىندە ءبىرىنشى ورىنعا يە بولدى. 2019 جىلى ءبىز ەكىنشى ورىنعا يە بولدىق. بۇل رەيتينگتى اقپاراتتاندىرۋ سالاسىنداعى ۋاكىلەتتى ورگان „اقىلدى“ قالالاردىڭ ەتالوندىق ستاندارتى نەگىزىندە جۇرگىزەدى. بۇل ستاندارت قالا تىرشىلىگىنىڭ 11 باعىتى بويىنشا 100-دەن استام جوبانى قامتيدى»، — دەپ حابارلادى ب. قوڭىربايەۆ.

قازىرگى ۋاقىتتا الماتى قالاسى اكىمدىگىنىڭ مەملەكەتتىك قىزمەتتەر تۇرلەرىنىڭ 90%-ى ەلەكتروندى بولىپ تابىلادى. balabaqsha.open-almaty.kz، bilimalmaty.kz اقپاراتتىق جۇيەسى، «دامۋمەد» مەديسينالىق اقپاراتتىق جۇيەسى، «InfoLab» اج، اۆتوماتتى ديسپەچەرلىك اقپاراتتىق جۇيەسى، «ەمدەۋگە جاتقىزۋ بيۋروسى» پورتالى جانە ت. ب. سىندى اقپاراتتىق جۇيەلەر قىزمەت ەتۋدە.

ات-قوعامداستىعىمەن ۋاقتىلى اقپاراتتاندىرۋ جانە ءوزارا بەلسەندى ءىس-قيمىل جاساۋ ءۇشىن digital-almaty.kz. پورتالى ازىرلەندى. ونىڭ پلاتفورماسىندا ازىرلەۋشىلەر قالانى سيفرلاندىرۋ بويىنشا ءوز يدەيالارىن ۇسىنا الادى.

«ەگەر سىزدە قىزىقتى قوسىمشا نەمەسە جاڭا اقپاراتتىق جۇيەنى قۇرۋ يدەيالارى بولسا، ولاردى پورتالعا ورنالاستىرا الاسىز. ەگەر سىزدەردىڭ ۇسىنىستارىڭىز قىزىقتى بولسا، ءبىز ولاردى جۇزەگە اسىرۋعا كومەكتەسەمىز. ات-ماماندارىن، كرەاتيۆتى سيفرلىق ۇيىمداستىرۋشىلاردى ءبىزدىڭ پورتالدى ءوز يدەيالارىن ورنالاستىرۋ ءۇشىن پايدالانۋعا شاقىرامىز»، — دەپ ۇندەدى ب. قوڭىربايەۆ.