جەلىدە ارمەنيانىڭ ەكس-پرەزيدەنتى سەرج سارگسيان مەن بەلارۋس باسشىسى الەكساندر لۋكاشەنكونىڭ تاۋلى قاراباق تۋرالى اڭگىمەسىنىڭ اۋديوجازباسى پايدا بولدى. اۋديوجازبادا ساياساتكەرلەر تاۋلى قاراباقتىڭ جەتى اۋدانىن ءازىربايجانعا بەرۋ كەزىندەگى سەنارييدى دامىتۋدىڭ ىقتيمال نۇسقالارىن تالقىلاعانى ەستىلەدى. سارگسياننىڭ كەڭسەسى جازبانىڭ ءتۇپنۇسقا ەكەنىن راستادى، دەپ حابارلادى Sputnik ارمەنيا.

اڭگىمە بارىسىندا لۋكاشەنكو سارگسيانعا ازەربايجان پرەزيدەنتى يلحام الييەۆتىڭ ۇسىنىسىنا كەلىسىپ، ۇجىمدىق قاۋىپسىزدىك تۋرالى شارت ۇيىمى (ۇقشۇ) تاۋلى قاراباقتاعى بىتىمگەرشىلىك ميسسياسىنىڭ "قاۋىپسىزدىك بەلدەۋىن" بەرۋدى ۇسىندى.

ءبىراق سارگسيان اۋدانداردى بەرگەن سوڭ ازەربايجان پرەزيدەنتى سوعىستى باستامايتىنىنا كۇماندى ەكەنىن جەتكىزدى.

– ءبىز بەيبىتشىلىك پەن تىنىشتىقتا ءومىر سۇرگىمىز كەلەدى، ءبىراق وكىنىشكە قاراي ءبىزدىڭ تىلەگىمىز جەتكىلىكسىز، – دەيدى سەرج سارگسيان.

– وعان اۋدانداردى بەرىڭىز ،ول (الييەۆ - رەد.) ءبىرىنشى كەزەڭدە 5 ميلليارد دوللار تولەۋگە دايىن، – دەدى لۋكاشەنكو.

– ول وسى جەتى اۋداندى تاستاپ كەتسە، مەن وعان 6 ميلليارد بەرەمىن، – دەپ جاۋاپ بەردى سارگسيان.

سارگسيان جەتى اۋداندى بەرۋگە قۇلىقتى ەمەستىگىن جەتكىزدى، ويتكەنى وندا بەس مىڭ ارميان جاۋىنگەرىنىڭ قانى توگىلگەن.

– ال، نە بوپتى؟ بىزدە 30 ميلليون ادام قايتىس بولدى، ءبىراق ءبىز نەمىستەرمەن سوعىسپايمىز، – دەدى لۋكاشەنكو.

ارمەنيانىڭ بۇرىنعى پرەزيدەنتىنىڭ باسپا ءسوز قىزمەتى لۋكاشەنكومەن اڭگىمە سارگسياننىڭ پرەزيدەنتتىك كەزەڭىندە ەريەۆاندا 2016 جىلدىڭ كۇزىندە ۇقشۇ سامميتىندە بولعانىن حابارلادى.

"ءۇشىنشى پرەزيدەنتتىڭ كەڭسەسى اۋديوجازبانى فاكت رەتىندە قابىلدايدى جانە جابىق فورماتتا وتكىزىلگەن وتىرىستار ءالى كۇنگە دەيىن تۇسىندىرىلمەگەندىكتەن، تۇسىنىكتەمە بەرۋدەن باس تارتادى"  دەلىنگەن حابارلامادا.