"نازاربايەۆ زياتكەرلىك مەكتەپتەرى" دەربەس ءبىلىم بەرۋ ۇيىمى 2021-2022 وقۋ جىلىندا 7-سىنىپتا وقۋعا ۇمىتكەر وقۋشىلارعا قازاقستان رەسپۋبليكاسى تۇڭعىش پرەزيدەنتىنىڭ "وركەن" ءبىلىم بەرۋ گرانتىن تاعايىنداۋ كونكۋرسىن جاريالادى. بۇل تۋرالى "Jetisy Media" اقپاراتتىق الاڭىندا ءمالىم بولدى.
ءبىلىم گرانتىنا ءوتىنىش قالدىرۋ مەرزىمى بيىلعى 2 جەلتوقسانىنان 2021 جىلدىڭ 23 قاڭتارىنا دەيىن جالعاسادى. كارانتيندىك شەكتەۋلەر كەزىندە سانيتارلىق تالاپتاردى ساقتاۋ جانە قاۋىپسىزدىكتى قامتاماسىز ەتۋ ماقساتىندا ءاربىر زياتكەرلىك مەكتەپتىڭ قابىلداۋ كوميسسياسىنا كەلۋشىلەر اعىمىن رەتتەۋ ءۇشىن ونلاين برونداۋ قىزمەتى جۇزەگە اسىرىلادى. بۇل قىزمەت قۇجاتتاردى تاپسىرۋ ءۇشىن مەكتەپكە كەلۋ كۇنى مەن ۋاقىتىن الدىن الا بەلگىلەۋگە مۇمكىندىك بەرەدى.
ۇمىتكەرلەر كونكۋرستىق ىرىكتەۋگە قاتىسۋ ءۇشىن قابىلداۋ كوميسسياسىنا كونكۋرسقا قاتىسۋ ءۇشىن ءوتىنىش بەرىپ،ساۋالناما تولتىرىپ، ۇمىتكەردىڭ تۋۋ تۋرالى كۋالىگىنىڭ كوشىرمەسى، ۇمىتكەردىڭ ءجسن-ى، بار بولعان جاعدايدا جەكە باس قۇجاتىنىڭ كوشىرمەسىن، زاڭدى وكىلدىڭ ءجسن-ى كورسەتىلگەن جەكە كۋالىگىنىڭ كوشىرمەسى مەن 086/ۋ مەديسينالىق انىقتاما فورماسىن جانە ۇمىتكەردىڭ سوڭعى وقۋ جىلىنداعى ۇلگەرىمى مەن ءتارتىبىنىڭ، ەگەر ۇمىتكەر وقۋ جىلىن اياقتاماعان جاعدايدا وقۋىن جالعاستىراتىن بولسا، وقۋ جىلىنىڭ I جارتى جىلدىعىنداعى ۇلگەرىمى مەن ءتارتىبى تۋرالى تابەلىنىڭ كوشىرمەسىن تاپسىرادى. تالاپ ەتىلگەن قۇجاتتار وقيتىن مەكتەپ باسشىسىنىڭ قولىمەن راستالىپ، ءتيىستى ءبىلىم بەرۋ ۇيىمىنىڭ مورىمەن بەكىتىلۋى كەرەك.
ال نەگىزگى تەستىلەۋ كەزەڭى كەلەر جىلى ناۋرىز ايىنىڭ 11-12 جۇلدىزىندا وتەدى.
ەلىمىزدىڭ باستى ءبىلىم بەرۋ ورداسىندا وقۋعا نيەتتى بوبەكتەر "ماتەماتيكا"، "ساندىق سيپاتتامالار"، "جاراتىلىستانۋ" پاندەرى مەن قازاق، ورىس، اعىلشىن تىلدەرى بويىنشا سىناق تاپسىرادى. وسى ارقىلى ۇستازدار قاۋىمى جاراتىلىستانۋ-ماتەماتيكالىق باعىتتاعى پاندەردى يگەرۋ قابىلەتىمەن، تىلدەردى مەڭگەرۋىن باعامدايدى. ايتا كەتەمىز، ەمتيحان تاپسىرۋ ۋاقىتى 120 مينۋتتى قۇرايدى. اتا-انالار سىناق تاپسىرۋ بارىسىن YouTube جانە QR كود ارقىلى ونلاين باقىلاي الادى.
مەملەكەت تاراپىنان ۇسىنىلعان بۇل گرانتتى جەڭىپ الۋ ءۇشىن وقۋشىلار نەگىزگى شەكتى بالدى جيناۋى ءتيىس. ماسەلەن، ماتەماتيكادان 140 باللدان كەم بولماۋى شارت. ال، ساندىق سيپاتتامالاردان 120 باللدان جوعارى مەجەنى باعىندىرۋ قاجەت. ءبىلىم مەكەمەسىنىڭ باسشىلىعىنىڭ ايتۋىنشا، ەمتيحانعا بيىلعى جىلى "جاراتىلىستانۋ" ءبولىمى بويىنشا اپروباسيالىق تەست وتكىزىلەدى. ءبىراق تا، وقۋشىلاردى ىرىكتەۋ كونكۋرسىندا اپروباسيانىڭ ناتيجەلەرى ەسەپتەلمەيدى. بالالار تاپسىرعان سىناق شەتەلدىك "سيتو" ورتالىعىنا جىبەرىلەدى. ونداعى ماماندار بىلىمگەرلەردىڭ قابىلەتىن تەكسەرەدى. ارتىنشا تەست ناتيجەلەرى مەكتەپ باسشىلىعىنا جەتكىزىلەدى. وسىلايشا ەمتيحاننىڭ قورىتىندىسى 40 كۇندە بەلگىلى بولادى.
بۇگىنگى كۇنى نازاربايەۆ زياتكەرلىك مەتەبىنە ءتۇسۋ ءۇشىن 86 وقۋشى ءوتىنىش بەرگەن. ونىڭ 70%- ى قازاق، قالعان 30% ورىس سىنىپتارىندا وقۋعا قۇلىق تانىتىپ وتىر.
"الداعى ۋاقىتتا نەشە سىنىپ اشىلاتىنى تەستىلەۋ ناتيجەسىنە بايلانىستى بولماق. وتكەن وقۋ جىلىندا 4 قازاق، 2 ورىس سىنىبىنا بالدىرعانداردى قابىلداعانبىز"، -دەيدى نازاربايەۆ زياتكەرلىك مەكتەبى ديرەكتورىنىڭ ءوقۋ-ىسى جونىندەگى ورىنباسارى ەرالي قىدىرباي ۇلى.
نازاربايەۆ زياتكەرلىك مەكتەبى تەك عىلىمعا عانا دەن قويىپ قويماي، بالالاردىڭ شىعارماشىلىقپەن اينالىسۋىنا دا مۇمكىندىك قاراستىرعان. وندا ءبىلىم الاتىن وقۋشىلار بوس اۋىقتتارىندا تەنيس، توعىزقۇمالاق، دويبى سىندى ۇيىرمەلەرگە قاتىسىپ قانا قويماي، "ۆيكيپەديا" اتتى ارنايى كلۋبتا مەملەكەتتىك تىلدە ماقالا جازىپ، ونى عالامتور كەڭىستىگىنە جۇكتەۋمەن اينالىسادى. ودان بولەك، "تۋعان ەلگە تاعىزىم"، "ەكى اپتا اۋىلدا" سىندى الەۋمەتتىك جوبالارعا دا قاتىسادى. بۇل ءوز كەزەگىندە بالالاردىڭ تۇلعالىق دامۋىنا ىقپال ەتەدى. سونداي-اق، قوسىمشا جۇڭگو،كارىس، نەمىس تىلدەرىن ۇيرەنە الادى. ءبىراق ەلدەگى ەپيدەميولوگيالىق جاعدايعا وراي بۇل جوبا ازىرگە توقتاپ تۇر.
بيىلعى جىلدان باستاپ اتالمىش ءبىلىم ورداسى باستاۋىش سىنىپتارعا ءبىلىم بەرۋىن توقتاتقان. ەندىگى دە ساپالى مەكتەپتە وقۋ تەك 7 سىنىپتان مۇمكىن بولماق. ەسەسىنە وقۋ ورداسىندا ەكى 12 سىنىپ تەرەڭدەتىلىپ وقىتىلادى. وڭىردەگى ۇزدىك ءبىلىم وشاعىنا ءتۇسۋشى جاستاردىڭ 40 پايىزى شالعاي-ەلدى مەكەننەن كەلۋشىلەردى قۇرايدى. ولاردىڭ وقۋىنا جاعداي جاساۋ ءۇشىن مەكتەپ جانىنان 146 ورىنعا لايىقتالعان جاتاقحانا دا قاراستىرىلعان.
بارشاعا بەلگىلى ەل اۋماعىندا كوروناۆيرۋس سالدارىنان وقۋ ونلاين فورماتقا اۋىستىرىلعان. اتالمىش مەكتەپتىڭ مۇعالىمدەرى Microsoft Teams پلاتفورماسىندا ءبىلىم بەرۋدى جالعاستىرۋدا. قاشىقتىقتان ءبىلىم بەرۋ جۇيەسى وقۋ ورداسىنىڭ كورسەتكىشىنە ەش كەرى اسەرىن تيگىزبەگەن. كەرىسىنشە باعالاۋ كورسەتكىشى سوڭعى 11 جىلدا ەڭ جوعارعى ناتيجەنى كورسەتىپ، 85 پايىزعا جەتكەن. ونىڭ سىرى، مەكتەپ باسشىلىعى ۇستازدار مەن وقۋشىلاردى كەرەكتىنىڭ بارلىعىمەن قامتىعانىندا. ءبىلىم ورداسى تاراپىنان 150-دەن استام وقۋشىعا نوۋتبۋك بەرىلگەن. ءدال سولاي مۇعالىمدەرگە دە تەحنيكالىق جاعىنان قولداۋ كورسەتىلىپ وتىر. بۇل ساپالى ءبىلىم بەرۋ ارقىلى، سانالى ۇرپاق تاربيەلەۋ جولىنداعى ولشەۋسىز ەڭبەكتىڭ ناتيجەcءى.
پىكىر قالدىرۋ