"كونستيتۋسياعا سايكەس 10 جەلتوقسان 18.01-دەن سايلاۋعا تۇسەتىن پارتيالاردىڭ ۇگىت-ناسيحات ناۋقانى باستالدى. كەزەكتى سايلاۋدىڭ ساياسي مەرزىمىن 3 كەزەڭگە ءبولىپ قاراستىرۋعا بولادى.

بىرىنشىدەن، كانديداتتاردى تىركەۋ ياعني ۇگىت الدىنداعى كەزەڭ. وسى كەزەڭدە پارتيالار ءتيىمدى جانە قاعىلەز جۇمىس ىستەي باستادى. ءبىر پارتيا ءتىپتى سايلاۋ تاعايىندالماي تۇرىپ ءوز ىشىنەن ىرىكتەۋدى ەرتە باستاسا، كەيبىر پارتيا اتاۋىن وزگەرتتى. جينالىستارىن جاڭا فورماتتا وتكىزىپ، نەمقۇرايلىلىقتان ارىلىپ، باعدارلامالارىن پىسىقتادى. سايلاۋ پروسەسىنىڭ نەگىزگى قاتىسۋشىلارى ساياسي پارتيالار مەن وسك جاقسى ۇيىمداستىرۋشىلىق الەۋەتىن كورسەتتى. 10 جەلتوقساندا ساياسي پارتيالار اراسىندا جەرەبە ويناتىلىپ، ولاردىڭ بيۋللەتەندەگى كەزەكتىلىگى انىقتالدى.

بۇل كەزەڭنىڭ ەڭ باستى ەرەكشەلىگى كانديداتتار قۇرامى ايتارلىقتاي جاڭاردى. اتاپ ايتقاندا، ماجىلىسكە قازىرگى دەپۋتاتتاردان 34ء-ى عانا قايتا ۇمىتكەر بولدى. بۇل وسى دەپۋتاتتار قايتا سايلاندى دەگەن كۇننىڭ وزىندە ءماجىلىس 63 پايىز جاڭارادى دەگەن ءسوز.

ەكىنشى، ۇگىت-ناسيحات ناۋقانى. ءبىر اي مەزگىل پارتيالاردىڭ ساياسي دودادا باسەكەلەستىگىن، مەملەكەتتىك باسقارۋ مەن قوعامدى دامىتۋدا ومىرشەڭدىگىن دالەلدەيتىن ۋاقىت. العاشقى كۇننەن ءبىز كانديداتتاردىڭ، سايلاۋ شتابتارىنىڭ ناۋقاندىق قاربالاستىعىن بايقادىق. مىسالى العاشقى مينۋتتاردا «اۋىل پارتياسى» رەسپۋبليكالىق شتابىنىڭ جينالىسىن وتكىزدى. سايلاۋ پروسەسى ەكونوميكالىق داعدارىس پەن كوروناۆيرۋستىق كارانتينگە قاراماستان ىشكى تۇراقتىلىق جاعدايىندا ءجۇرىپ جاتىر.

ءۇشىنشى كەزەڭ، ارينە سايلاۋ كۇنى. ال، سايلاۋدىڭ قالاي ءوتىپ، كرەسلولاردىڭ كىمنىڭ ەنشىسىندە تيەتىنى سايلاۋعا تۇسكەن ساياسي پارتيالاردىڭ العاشقى ەكى كەزەڭدە جۇرگىزگەن جۇمىسىنا بايلانىستى" دەپ جازدى جۋرناليست.

ال ەۋرازيالىق ينتەگراسيا ينستيتۋتىنىڭ ساراپشىسى باۋىرجان سەرىكبايەۆ تارتىستى ساياسي ناۋقان بولاتىنىن اتاپ ءوتتى.

"ساياسي پارتيالار ءوز ۇگىت-ناسيحات جۇمىستارىن باستادى. ناۋقان باستالماي تۇرىپ ەكى پارتيا رەبرەندينگ جاسادى. ءوز باعدارلامالارىن، باعىتتارىن بەلگىلەدى. سەزدەرىن وتكىزدى. 10 جەلتوقساندا ساعات 18:01-دەن باستاپ ساياسي پارتيالار بەلسەندى تۇردە ەلدى ناسيحاتتاۋعا كوشتى. حالقىمىز دا وتە مۇقيات تىڭداپ، باقىلاپ وتىر. جالپى قىزىق بولىپ جاتىر ەندى. بۇگىن استانا قالاسىندا بيلبوردتار ىلىنە باستادى. بۇل دا بۇقارانى وزىڭە تارتۋدىڭ ءبىر جولى. تارتىستى ساياسي ناۋقان بولاتىن سەكىلدى. ءبىزدىڭ قوعام دا Facebook-تە پىكىرىن ءبىلدىرىپ جاتىر. بۇل دا دۇرىس. ەڭ تارتىستى باسەكە ونلاين الەمدە بولادى. قارقىندى وتۋدە. وسىلاي بولعانى دا جاقسى. نە بار كوشەدە؟.. توڭىپ، جاۋراپ. قىستىڭ سۋىعىندا ءبارى ونلاين Facebook-تە بولعانى جاقسى عوي نەگىزى. جالپى بۇل سايلاۋ ءبىزدى ءبىر ساتى العا جىلجىتاتىن، ساياسي مادەنيەتتى كوتەرەتىن ناۋقان بولادى دەپ ۇمىتتەنەمىن" دەپ جازدى ول Facebook-تەگى پاراقشاسىندا. 

اتالمىش ينستيتۋتتىڭ تاعى ءبىر ساراپشىسى سامات نۇرتازانىڭ پىكىرىنشە، ءار پارتيا ءوزىنىڭ ورتالىقتارىن كورسەتىپ، بارلىق پارتياعا ب ا ق وكىلدەرى بىردەي كوزقاراس تانىتىپ جاتىر.

"مەن وسكەمەندە ەلدىڭ قامىمەن شاپقىلاپ جۇرگەندە، ەل اعالارى ۇگىت-ناسيحات ناۋقانىن باستاپ جىبەرىپتى. كەشە نۇر-سۇلتانعا كەلسەم، بارلىق پارتيانىڭ وكىلدەرى حابارلاسىپ «ساكەم-اۋ، ءبىزدىڭ پارتياعا وتسەڭشى» دەپ جىلى شىراي ءبىلدىرىپ جاتىر. ەلىمىزدىڭ دەموكراتيالانعانىنا ريزا بولدىم. Facebook جەلىسى قايناعان قازانداي بۇرقىلداپ، ءار پارتيا ءوز جۇمىسىن پاش ەتۋگە قۇلشىنىپ جاتقانى بايقالدى. ءار پارتيا ءوزىنىڭ ورتالىقتارىن كورسەتىپ، بارلىق پارتياعا ب ا ق وكىلدەرى بىردەي كوزقاراس تانىتقانداي سەزىلدى. «مەن ەلەۋسىز قالدىم، مەنى ىعىستىرىپ جاتىر» دەگەن ءبىر پارتيا وكىلدەرىن كورمەدىم. قۋانتارلىق جاعداي. ەس جيناپ، ەتەك جەڭىمىزدى جيناپ، ەل بولدىق دەگەن وسى. كوشەنى ايتساڭشى، كوشەدە بيلبوردتار پارتيا جارناماسىمەن تۇرعاندا، ءوزىڭدى ترامپ پەن بايدەننىڭ تاعدىرىن شەشەتىن ازاماتتاي سەزىنىپ قالدىم. ءلايىم، سول دەموكراتيانىڭ اتاسى قازاق ەلىندە ورنايدى. ءوز باسىم سوعان سەنەمىن" دەپ الەۋمەتتىك جەلىدە ويىمەن ءبولىستى.