«Nur Otan» رەسپۋبليكالىق سايلاۋالدى شتابى وڭىرلەرگە ساپارىن جالعاستىرۋدا. بۇگىن بيلەۋشى پارتيا وكىلدەرى اقمولا وبلىسىنا كەلدى.

سايلاۋالدى شتاب مۇشەلەرى كوكشەتاۋ قالاسىندا جاس ماماندارمەن جانە «سەرپىن» مەملەكەتتىك باعدارلاماسىنىڭ قاتىسۋشىلارىمەن بىرگە جاستاردىڭ ءوز قابىلەتتەرىن ىسكە اسىرۋىنا جاعداي جاساۋ، ساپالى بىلىمگە قول جەتكىزۋدى قامتاماسىز ەتۋ، بوس ۋاقىتتى ءتيىمدى وتكىزۋ مەن جۇمىسقا ورنالاستىرۋ ماسەلەلەرىن تالقىلادى.

«Nur Otan» جوعارى ءبىلىم الۋ ءۇشىن گرانتتاردىڭ سانىن كەمىندە 50%-كە ۇلعايتۋعا ىقپال ەتەدى. جىل سايىن 75 مىڭ جاس قازاقستاندىق تەگىن جوعارى ءبىلىم الا الادى. بۇل رەتتە 2025 جىلعا قاراي سۇرانىسقا يە ماماندىقتار بويىنشا كوللەدجدەردە ءبىلىم الۋ تەگىن بولادى»، - دەپ اتاپ ءوتتى رەسپۋبليكالىق سايلاۋالدى شتاب جەتەكشىسى باۋىرجان بايبەك.

ونىڭ ايتۋىنشا، پارتيانىڭ سايلاۋالدى باعدارلاماسى اياسىندا ستۋدەنتتەردىڭ شاكىرتاقىسىن 2 ەسە، ماگيسترانتتار مەن دوكتورانتتاردىڭ ستيپەندياسىن – 1،5 ەسە كوتەرۋ، كوللەدجدەر مەن ۋنيۆەرسيتەتتەر جاتاقحانالارىندا كەمىندە 50 مىڭ جاڭا ورىن ەنگىزۋ كوزدەلۋدە.

جىلىنا 5 مىڭ ادامدى قامتي وتىرىپ، «العاشقى جۇمىس ورىن» جوباسىن ىسكە قوسۋ جوسپارلانۋدا. جاس كاسىپكەرلەردىڭ جاڭا بيزنەس-يدەيالارىن جۇزەگە اسىرۋى ءۇشىن جىل سايىن 10 مىڭ گرانت ۇسىنىلادى. ⠀

سايلاۋالدى شتاب مۇشەلەرى وسى كۇنى اۋىل شارۋاشىلىق تەحنيكاسىن قۇراستىرۋ زاۋىتىنىڭ جۇمىسشىلارىمەن دە كەزدەستى.

تاياۋداعى 5 جىلدا ەلىمىزدە اۋىل شارۋاشىلىعى ونىمدەرىن ءوندىرۋ مەن وڭدەۋ بويىنشا 7 ءىرى اگروونەركاسىپتىك ەكوجۇيەنى ىسكە قوسۋ، وعان 350 مىڭ فەرمەرلىك جانە ءۇي شارۋاشىلىعىن تارتا وتىرىپ، جۇمىسپەن قامتۋ كوزدەلىپ وتىر. جاڭادان 600 مىڭ گەكتار سۋارمالى جەردى يگەرۋ ەسەبىنەن پارتيا جاڭادان 70 مىڭ فەرمەرلىك شارۋاشىلىق اشۋدى ىنتالاندىرماق.

وسى جانە باسقا دا شارالار nurotan2021.kz سايتىنداعى سايلاۋالدى باعدارلامادا جازىلعان ارناۋلى تەحنيكاعا دەگەن سۇرانىستى ارتتىرىپ، وتاندىق ماشينا جاساۋ سالاسىن قاجەتتى جۇمىس كولەمىمەن قامتاماسىز ەتۋى ءتيىس، دەپ مالىمدەدى پارتيانىڭ باسپا ءسوز قىزمەتى.

اقمولا وبلىسىنا ساپار بارىسىندا پارتيا ءتوراعاسىنىڭ ءبىرىنشى ورىنباسارى ازاماتتاردى جەكە قابىلدادى.

ماسەلەن، قابىلداۋدا بولعان بۇلاندى اۋىلىنىڭ تۇرعىنى رەزيدا ابدراحمانوۆا اۋىلداعى اپاتتى جاعدايدا تۇرعان جالعىز مەكتەپتى جوندەۋ جونىندە ءوتىنىش ءبىلدىردى. ال ارشالى اۋىلىنان كەلگەن نۇرمۇحانبەت قاسىمحان ءوز اۋىلداستارىنىڭ مادەنيەت ءۇيىن سالۋ تۋرالى ءوتىنىشىن جەتكىزدى.

كوكشەتاۋ تۇرعىنى شياپ الييەۆ قالانى گازداندىرۋ ماسەلەسىن كوتەردى. ارايلى اۋىلىنىڭ تۇرعىنى جانسايا ايتبايەۆا اۋىلداعى بارلىق كوشەنى سۋمەن قامتاماسىز ەتۋ مۇمكىندىگىن قاراستىرۋدى ءوتىندى. وسىندا ايتىلعان بارلىق ماسەلە، اماناتتار مەن ۇسىنىستار ەرەكشە پارتيالىق باقىلاۋعا الىنادى.