"اق جول" پارتياسىنىڭ ءتوراعاسى ازات پەرۋاشيەۆ وزدەرىن تاجىريبەلى پارتيا ەكەنىن ايتىپ، سايلاۋالدى ناۋقان بارىسىندا زاڭسىزدىقتارعا بارمايتىنىن ءمالىم ەتتى.
بۇعان دەيىن ەكس-بانكير، قازاقستاندا ەكسترەميستىك دەپ تانىلعان "قازاقستاننىڭ دەموكراتيالىق تاڭداۋى" قوزعالىسىنىڭ جەتەكشىسى مۇحتار ءابليازوۆ جاقتاستارىن نۇر وتان پارتياسىنا قارسىلىق رەتىندە اق جول پارتياسىنا داۋىس بەرۋگە شاقىرعان. سونداي-اق ول نۇر وتان پارتياسىنىڭ ۇگىت قاعازدارىن جىرتۋعا، ءىلىنىپ تۇرعان جەرىنەن الىپ تاستاۋعا ۇندەگەن.
ازات پەرۋاشيەۆ زاڭ تالاپتارىنا سايكەس كەلمەيتىن ۇگىت-ناسيحات ماتەريالدارى پارتيا تاراپىنان جاسالىنىپ جاتپاعانىن اتاپ ءوتتى.
– كەز كەلەن سايلاۋشى بەلگىلى ءبىر پارتيا ءۇشىن داۋىس بەرسە، دەمەك ول باسقا پارتيالارعا قارسى داۋىس بەرگەنى عوي. "اق جول" پارتياسى ون سەگىز جىلدىق تاجىريبەسى بار، كوپ جىلدار بويى ساياسي ساحنادا جۇرگەن پارتيا رەتىندە تەك زاڭدىق شارالاردى عانا جاسايدى ءارى ازاماتتاردى سايلاۋالدى زاڭناماعا ارەكەتتەردى عانا ىستەۋگە شاقىرادى. ەگەر سايلاۋشىلار، بولماسا باقىلاۋشىلار زاڭ تالاپتارىنا سايكەس كەلمەيتىن، زاڭ تالاپتارىنا جاۋاپ بەرمەيتىن ۇگىت-ناسيحات ماتەريالدارىن نەمەسە ۇگىت-ناسيحات ءىس-شارالارىن كورسە، بۇل "اق جول" پارتياسىنىكى ەمەس ەكەنىن مالىمدەيمىن، – دەدى ازات پەرۋاشيەۆ.
بۇعان دەيىن مۇحتار ءابليازوۆ جاقتاستارىن نۇر وتان-عا قارسىلىق رەتىندە جسدپ پارتياسىنا داۋىس بەرۋگە شاقىرعان. جسدپ وكىلدەرى ەكس-بانكير ارەكەتىن "ارانداتۋ" دەپ باعالاعان. ارتىنشا جسدپ الداعى پارلامەنت ءماجىلىسى سايلاۋىنا بويكوت جاريالاعان.
پىكىر قالدىرۋ