ءبىلىم جانە عىلىم ءمينيسترى اسحات ايماعامبەتوۆ ءبىلىم بەرۋ مەكەمەلەرىندە جالعان ناگرادالاردى ساتىپ الۋدى توقتاتۋ قاجەتتىگىن ايتتى.
– ساتىپ الاتىن ماراپات، ماراپات ەمەس. تۇسىنەمىن كەي ۋاقىتتاردا قوعامدىق ءارتۇرلى ماراپاتتار بولادى. ءبىراق ولار اقىلى بولماۋى كەرەك. قوعامدىق ماراپات اقىلى بولاتىن بولسا، ونىڭ ەشقانداي قاسيەتى، قۇندىلىعى جوق. ءبىز مۇنداي ماسەلەنى ءتۇسىندىرۋىمىز كەرەك. كەي ارىپتەستەرىمىز مۇنى تۇسىنبەي وسىنداي جولعا بارىپ جاتادى. مۇنداي ماسەلەلەردى ايتپاساق بولمايدى.
بارلىق مەكتەپتەردە وتەتىن اقىلى كونكۋرستار، وليمپيادالار، جارىستار اقىسىز بولۋى كەرەك. مەكتەپتەردە مۇنداي كونكۋرستار كوپ بولۋى قاجەت، ونى كوبەيتەمىز. ءبىراق ونىڭ ءبارى تەك قانا اقىسىز وتەتىن بولادى. ەگەر دە بالالاردىڭ اتا-انالارى وزدەرى قالاپ اقىلى نەمەسە اقىسىز بولعانىن قالاسى، ول ءوز ەرىكتەرى. ال، مەكتەپ، ءمۇعالىم ۇيىمداستىراتىن اقىلى جارىستار بولاتىن بولسا، وعان توسقاۋىل قويامىز. اقىسىز وتكىزىپ جاتقان وليمپيادا، جارىستاردىڭ بەكىتىلگەن ءتيىستى تالاپتارى بار. ونىڭ ىشىندە اكادەميالىق ادالدىق قاعيدالارىن ساقتاۋى كەرەك. وليمپيادانى مەكتەپ، نە سىنىپ دەڭگەيىندە وتكىزسەك، ونىڭ ءتيىستى قاعيدالارىن ساقتاپ وتكىزبەسەك، ونىڭ قۇنى بەس تيىن، – دەدى مينيستر.
پىكىر قالدىرۋ