ۇلتتىق قوردان 1 تيىن بولمەي، ازاماتتاردىڭ الەۋمەتتىك جاعدايىن جاقسارتۋعا قاراجات تابۋعا بولادى. بۇل تۋرالى ADAL پارتياسىنىڭ مۇشەسى، جۋرناليست ماقسات تولىقباي "Qazaqstan" تەلەارناسىندا ءوتىپ جاتقان تەلەدەباتتا ايتتى.

جۋرناليست بيۋدجەت قىزمەتكەرلەرى جالاقىسىن كەمىندە 200 مىڭ تەڭگەگە دەيىن كوتەرۋ، شاكىرتاقى مولشەرىن ارتتىرۋ، تومەنگى جالاقىنى 42500 تەڭگەدەن 60 مىڭ تەڭگەگە كوتەرۋ كەرەكتىگىن اتاپ ءوتتى.

سونداي-اق ول ADAL پارتياسى كاسىپكەرلەر ءۇشىن جىلىنا 6 پايىزبەن كەپىلسىز نەسيە ۇسىنۋ قاجەتتىگىنە نازار اۋداردى.

– جاستاردىڭ باستى پروبلەمالارىنىڭ ءبىرى –  باسپانا. وسى رەتتە يپوتەكاعا العان باسپانانىڭ ءوزىن كەپىلگە قويۋدى جۇزەگە اسىرۋدى ۇسىنامىز. ويتكەنى جاستاردا كەپىلگە قويارلىقتاي مۇلىك جوق. سونىمەن قاتار العاشقى جارناعا تۇرعىن ءۇي سەرتيفيكاتتارىن بەرۋدى 3 قالادان باسقا قالالاردا دا جۇرگىزۋ كەرەك. پارتيانىڭ تاعى ءبىر ۇسىنىسى –  ازاماتتاردى بالا تۋۋىعا ىنتالاندىرۋ. 1 بالا تاپتىڭ با يپوتەكادان 2 پايىزدى قىسقارت، 2 بالاعا 4 پايىزعا قىسقارت. سوڭىندا ءۇيدىڭ العان باعاسىن عانا تولەسىن. مۇنىڭ بارىنە ۇلتتىق قوردان 1 تيىن جاراتپاي-اق قارجى تابۋعا بولادى. ول ءۇشىن مەملەكەتتىك ساتىپ الۋ شىعىندارىنان ۇنەمدەسە جەتكىلىكتى. شەنەۋنىكتەرىمىز ءبىر جولعا كامري كولىگىن ەمەس، كوروللا ءمىنسىن، كابينەتىنە قىمبات كىلەم ەمەس، ارزانىراعىن ءىلسىن. بولادى عوي. حالىقتى اۋەلى كەدەيشىلىكتەن قۇتقارۋ كەرەك، –  دەدى ول.