پارلامەنتتە «ءولىم جازاسىنىڭ كۇشىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىگە ەكىنشى فاكۋلتاتيۆتىك حاتتامانى راتيفيكاسيالاۋ تۋرالى» قازاقستان رەسپۋبليكاسى زاڭ جوباسى قارالدى، دەپ حابارلادى inbusiness.kz.

بۇۇ-نىڭ 1966 جىلعى ازاماتتىق جانە ساياسي قۇقىقتارى تۋرالى حالىقارالىق پاكتىنى دامىتۋ ءۇشىن قابىلدانعان ەكىنشى حالىقارالىق قۇجات ءبىزدىڭ ەلدە  2005 جىلى راتيفيكاسيالاندى.

بۇل تۋرالى سىرتقى ىستەر ءمينيسترى مۇحتار تىلەۋبەردى: «قازاقستان تاۋەلسىزدىككە قول جەتكىزگەننەن باستاپ  بۇۇ مەن ەقىۇ مۇشەلىگى تۇرعىسىندا قابىلدانعان ادام قۇقىقتارى سالاسىنداعى مىندەتتەمەلەرگە سايكەس ءولىم جازاسىن قولدانۋدى بىرتىندەپ تارقاتۋ جانە قىلمىستىق زاڭنامانى ىزگىلەندىرۋ ساياساتىن جۇرگىزىپ كەلەدى.

ق ر تۇڭعىش پرەزيدەنتى - ەلباسى نۇرسۇلتان نازاربايەۆ  2003 جىلعى 17 جەلتوقساندا قازاقستان رەسپۋبليكاسىندا ءولىم جازاسىن قولدانۋعا موراتوريي ەنگىزۋ تۋرالى جارلىققا قول قويدى. سايكەسىنشە جازانىڭ بۇل ءتۇرىن قولدانۋ تولىعىمەن توقتاتىلدى. جاھاندىق ۇدەرىستەرگە بەلسەندى ىقپالداسۋ ساياساتىن جۇرگىزۋ، سونداي-اق الەمدىك وبوليۋسيانيستىك ترەندتى نازارعا الا وتىرىپ 2019 جىلعى جەلتوقساندا پرەزيدەنت قاسىم-جومارت توقايەۆ قازاقستاننىڭ ەكىنشى فاكۋلتاتيۆتى حاتتاماعا قوسىلۋ ءراسىمىن باستاۋدى تاپسىردى. وسىلايشا پرەزيدەنتتىڭ جارلىعىنا سايكەس 23 قىركۇيەكتە بۇۇ جانىداعى قازاقستاننىڭ تۇراقتى وكىلى قايرات وماروۆ ەكىنشى فاكۋلتاتيۆتى حاتتاماعا قول قويدى. قازاقستان رەسپۋبليكاسىنىڭ حالىقارالىق شارتتارى تۋرالى 2005 جىلعى 30 مامىرداعى زاڭىنىڭ 11 بابىنىڭ 1 جانە 2 تارماقتارىنا سايكەس، ەكىنشى فاكۋلتاتيۆتى حاتتاما راتيفيكاسيالانۋى ءتيىس. حالىقارالىق قۇجاتقا سايكەس قول قويۋشى ەلدەر ءولىم جازاسىن قولدانباۋ جانە ءوز زاڭناماسى شەڭبەرىندە ءولىم جازاسىنىڭ كۇشىن جويۋ ءۇشىن بارلىق قاجەتتى شارالاردى ورىنداۋ مىندەتتەمەسىن قابىلدايدى. جالعىز ەرەكشەلىك سوعىس ۋاقىتىندا ءولىم جازاسىن قولدانۋ تۋرالى زاڭدى تۇردە راسىمدەلگەن ەسكەرتپە بولعان جاعدايدا رۇقسات ەتىلەدى»، – دەدى مينيستر. 

ونىڭ تۇسىندىرۋىنشە، قازاقستان ءولىم جازاسىن ءبىر جاعدايدا عانا قولدانۋ قۇقىعىنان باس تارتپاعان.

«قازاقستان رەسپۋبليكاسى ەكىنشى فاكۋلتاتيۆتىك حاتتامانىڭ 2-بابىنا سايكەس سوعىس ۋاقىتىندا جاسالعان اسكەري اسا اۋىر سيپاتتاعى قىلمىس ءۇشىن كىنالى دەپ تانىلعاندارعا سوعىس ۋاقىتىندا ءولىم جازاسىن قولدانۋ قۇقىقىعىن وزىنە قالدىرادى، – دەدى مۇحتار تىلەۋبەردى.