بەيجىڭ وڭتۇستىك-قىتاي تەڭىزىندەگى داۋلى ايماققا ەكىنشى امفيبيالىق شابۋىل كەمەسىن جىبەردى.
"075 ءتيپتى" اسكەري كەمە سوعىس ۇشاقتارىن تاسيدى. مالىمەتتەرگە سايكەس، ول شانحايداعى حۋدۋن چجۋنحۋا ۆەرفىنەن ءجۇزىپ شىققان.
كەمە شىعىس جۇڭگو تەڭىزىنە قاراي بەت الۋدا. "باستاپقى جوبا بويىنشا تىكۇشاقتى تاسىمالداۋعا قابىلەتتى جانە سىيىمدىلىعى 30 000 توننا كەمە قاجەت بولعان" دەپ حابارلادى NavalNews.
دەگەنمەن، بۇل كەمەنىڭ تەحنيكالىق سيپاتتامالارى باستاپقى جوبادان اسىپ تۇسەدى. ونىڭ سىيىمدىلىعى 36000 توننا. ونىڭ 28 تىكۇشاق كوتەرە الاتىنى دا ايتىلادى.
جۇڭگو اسكەري كۇشتەرى "075 ءتيپتى" كەمەلەردىڭ سەگىزىنە تاپسىرىس بەرگەن. ءۇشىنشىسى كەلەسى جىلدىڭ باسىندا جەتكىزىلمەك.
سوڭعى كەزدەر اقش-قىتاي اراسىندا اسكەري قايشىلىق كۇشەيە ءتۇستى. اسىرەسە وڭتۇستىك جۇڭگو تەڭىزىندەگى داۋلى ايماققا جانە تايۆانعا قاتىستى ەكى الپاۋىت ەلدىڭ شيەلەنىستەرى ارتتى.
بيىل ۆاشينگتون تايۆانعا ءبىرقاتار ۇكىمەتتىك شەنەۋنىكتەردى، سونىڭ ىشىندە اقش مەملەكەتتىك حاتشىسىنىڭ ەكونوميكالىق ماسەلەلەر جونىندەگى ورىنباسارى كيت كراچتى جىبەردى.
جۇڭگو اقش-تى تايۆانمەن "كەز كەلگەن رەسمي قاتىناستى توقتاتۋعا" شاقىردى.
ايتا كەتەيىك، بۇعان دەيىن قىتاي-رەسەي بىرىككەن بومبالاۋشىلارى اقش كەمەلەرى جۇرگەن داۋلى ايماقتىڭ ۇستىندە ۇشقانى جاريالانعان. ىلە شالا جاپونيا مەن وڭتۇستىك كورەيا ولارعا قارسى جويعىش ۇشاقتارىن بىرىكتىرگەنى حابارلاندى. كوپ وتپەي بەيجىڭ سوعىس كەمەسى اقش زىمىران جويعىشىن وكشەلەي قۋعانى ءمالىم بولدى.
پىكىر قالدىرۋ