قازاقستاندا شامامەن 1 ملن ادام زەينەتاقى جيناقتارىنىڭ ءبىر بولىگىن پايدالانۋعا قۇقىلى. بۇل تۋرالى ەڭبەك جانە حالىقتى الەۋمەتتىك قورعاۋ ۆيسە-مينيسترى ءاقمادي سارباسوۆ ورتالىق كوممۋنيكاسيالار قىزمەتىندە وتكەن بريفينگتە ايتتى.

23 جەلتوقساندا زەينەتاقى جيناقتارىنىڭ ءبىر بولىگىن تۇرعىن ءۇي جاعدايلارىن جاقسارتۋعا، ەمدەلۋ اقىسىن تولەۋگە نەمەسە جەكە قارجى كومپانيالارىنىڭ باسقارۋىنا بەرۋگە پايدالانۋ قۇقىعىن بەرەتىن زاڭ قابىلداندى.

– بجزق-دا جيناعى بار، جاسى "جەتكىلىكتى شەكتەن" اساتىن سومانىڭ ءبىر بولىگىن پايدالانا الاتىن جۇمىس ىستەيتىن ازاماتتارعا قۇقىق بەرىلەدى. وسىنداي 760 مىڭعا جۋىق ازامات بار. ورتا ەسەپپەن ءبىر ادامعا 2،3 ملن تەڭگەدەن كەلەدى. بەلگىلى ءبىر سوما سالىمشىنىڭ شوتىندا قالۋعا ءتيىس.

ەكىنشى سانات – زەينەتكەرلەر. ولار زەينەتاقىسىنىڭ جيىنتىق مولشەرىنەن ايىرىلعان تابىستىڭ 40% دەڭگەيىندە الماستىرۋدى قامتاماسىز ەتكەن جاعدايدا، جيناقتاردىڭ جارتىسىنا دەيىن پايدالانا الادى. مۇنداي قازاقستاندىقتاردىڭ سانى 170 مىڭعا جۋىق. ورتا ەسەپپەن، ءارقايسىسىنا جارتى ميلليون تەڭگەدەن كەلەدى.

ءۇشىنشى سانات – زەينەتاقى اننۋيتەتىن رەسىمدەگەن جانە بجزق-دا جيناقتارى بار ازاماتتار. وندا ورتا ەسەپپەن 23 مىڭ ادامنىڭ ءارقايسىسىنا 2،5 ملن تەڭگەدەن كەلەدى، – دەدى ۆيسە-مينيستر.

ونىڭ ايتۋىنشا، وسى ءۇش سانات بويىنشا شامامەن 1 ملن ادام زەينەتاقى جيناقتارىنىڭ ءبىر بولىگىن پايدالانۋعا، الۋعا قۇقىلى.

– ءتيىستى جۇمىستار جۇرگىزىلىپ جاتىر. قاڭتار ايىندا زاڭعا بايلانىستى بارلىق نورماتيۆتىك-قۇقىقتىق اكتىلەر قابىلدانىپ، ازاماتتارعا زەينەتاقى جيناقتارىنىڭ ءبىر بولىگىن الۋ قۇقىعىن بەرۋدى تولىعىمەن ىسكە قوسامىز دەپ كۇتىلىپ وتىر، – دەدى الەۋمەتتىك ورگان وكىلى.