اقمارال بۇرلىبايەۆا ەسىمدى Facebook قولدانۋشىسى ءوزىن مەكتەپكە دەيىنگى مەكەمەنىڭ باسشىسى گازەتتەرگە كۇشتەپ جازدىرىپ جاتقانىن ايتىپ شاعىمدانعان. ارتىنشا شاعىمدانۋشى تۇلكىباس اۋدانى ساستوبە اۋىلى "قارلىعاش" بالاباقشاسىنىڭ تاربيەشىسى ەكەنى بەلگىلى بولدى. بۇگىندە شاعىم بويىنشا اكىمشىلىك ءىc قوزعالدى. بۇل تۋرالى ق ر بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتى حابارلادى
– بالاباقشا ادىسكەرىنە قاتىستى ق ر اقبتك 409-بابىنىڭ 7-3 تارماعى جانە 409-بابىنىڭ 7-6 تارماعى بويىنشا گازەتتەرگە جازىلۋعا ماجبۇرلەۋ جانە پەداگوگيكالىق ادەپتىڭ ساقتالماۋى تۋرالى ەكى اكىمشىلىك ءىس قوزعالدى. وسىعان بايلانىستى ق ر زاڭناماسىمەن بەكىتىلگەن تالاپتارعا سايكەس ەسكەرتۋ تۇرىندەگى اكىمشىلىك جاۋاپكەرشىلىك قولدانىلدى جانە 30 ايلىق ەسەپتىك كورسەتكىش مولشەرىندە ايىپپۇل سالىندى. بۇل الدىن الا قاراۋدىڭ قورىتىندىسى، – دەدى ق ر بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.
كوميتەت تاراپىنان پەداگوگتەردىڭ گازەتتەر مەن جۋرنالدارعا جازىلۋى ەرىكتى تۇردە جۇزەگە اسىرىلۋعا ءتيىس ەكەنىن ەسكە سالىپ، جازىلۋعا ماجبۇرلەۋگە تىيىم سالىنعانىن اتاپ ءوتتى. قۇقىقتارى مەن مۇددەلەرى بۇزىلعان جاعدايدا مۇعالىمدەر وڭىرلىك ءبىلىم سالاسىندا ساپانى قامتاماسىز ەتۋ دەپارتامەنتتەرىنە جۇگىنە الادى.
پىكىر قالدىرۋ