پرەزيدەنت قاسىم-جومارت توقايەۆ قازاقستاندىقتاردى جاڭا – 2021 جىلدىڭ كەلۋىمەن قۇتتىقتادى.

"ساناۋلى مينۋتتان سوڭ 2020 جىل تاريح قويناۋىنا ەنەدى. وسى مەرەيلى مەزەتتە ەسكى جىلمەن قوشتاسىپ، بولاشاققا باعدار تۇزەمىز. بۇل – ءبارىمىز جايدارى كوڭىلمەن بىر-بىرىمىزگە اق تىلەك ارنايتىن ايرىقشا ءسات.

ءوتىپ بارا جاتقان جىل كۇللى الەم جۇرتشىلىعىنىڭ ەسىندە قالاتىن ەرەكشە جىل بولدى. دۇنيە ءجۇزى بۇرىن-سوڭدى بولماعان الاپات ىندەتپەن بەتپە-بەت كەلدى. ءبىزدىڭ حالقىمىزعا دا ونىڭ زاردابى ءتيدى. وسىنداي قيىن كەزەڭدە تۇتاس ۇلت بولىپ بىرلىگىمىزدىڭ قادىر-قاسيەتىن جەتە سەزىندىك. دەرتكە شالدىققان ءاربىر ادامنىڭ تەزىرەك ساۋىعىپ كەتۋىن تىلەدىك. ءبىراق ىندەت ادام تالعامايدى. پاندەميانىڭ سالدارىنان كوپتەگەن ازاماتتارىمىزدان ايىرىلىپ قالدىق. ولاردىڭ ىشىندە ەلىمىزدى وركەندەتۋگە زور ۇلەس قوسقان تانىمال تۇلعالار دا بار. ومىردەن وتكەن ادامداردىڭ يماندارى سالامات بولسىن! ەندى مۇنداي قاسىرەت قايتالانباسىن. بۇل ءۇشىن قولدان كەلگەننىڭ ءبارىن جاسايمىز. ءار ازامات مەملەكەتتىڭ قامقورلىعىندا بولادى. الداعى جىلدان باستاپ كوروناۆيرۋسقا قارسى تەگىن ۆاكسينا ەگۋدى باستايمىز. ونى ازاماتتاردىڭ قالاۋىمەن، ەرىكتى تۇردە جۇرگىزەمىز.

وسى كۇردەلى كەزەڭدە حالقىمىز بەرەكە-بىرلىگى مەن ىنتىماعىن ارتتىرا ءتۇستى. وتانداستارىمىز بىر-بىرىنە قول ۇشىن بەرىپ، جاناشىرلىق تانىتتى. بۇل – شىن مانىندە، ىزگىلىك پەن قايىرىمدىلىقتىڭ ۇلگىسى. ەڭ باستىسى، ءبىز ءبارىمىز بىرگە بولدىق. مەملەكەت تاراپىنان ميلليونداعان ادامعا قولداۋ جاسالدى. ءبىز قوعامنىڭ يگىلىگى ءۇشىن قاجىرلى ەڭبەك ەتىپ جۇرگەن ازاماتتاردىڭ جۇمىسىن باعالاي بىلدىك. دارىگەرلەر، مۇعالىمدەر، ءتارتىپ ساقشىلارى، ەرىكتىلەردىڭ ەرەن ەرلىگىنە كۋا بولدىق. بۇل ازاماتتار – بەيبىت كۇننىڭ ناعىز باتىرلارى. ولارعا حالقىمىز شەكسىز ريزا.

كەلە جاتقان جاڭا جىل – قاسيەتتى تاۋەلسىزدىگىمىزدىڭ 30 جىلدىعى. ءبىز ەگەمەن ەلىمىزدىڭ تاريحىنداعى ءتورتىنشى ونجىلدىققا قادام باسامىز. بۇل – شىن مانىندە، اسا ماڭىزدى بەلەس. ءبىز كەلەشەكتە قازاق ەلىنىڭ قۋاتىن ودان ءارى ارتتىرا تۇسەمىز. بارلىق سالاداعى رەفورمالار لايىقتى جالعاسىن تابادى.

مەنىڭ باستى ميسسيام – حالقىمىزدىڭ تۇرمىس ساپاسىن جاقسارتۋ ءۇشىن ساباقتاستىققا نەگىزدەلگەن ءتيىمدى ساياسات جۇرگىزۋ. ءبىز اسپەن دە، تاسپەن دە ۇلتتىق مۇددەلەرىمىزدى تاباندىلىقپەن قورعايمىز. ءححى عاسىردىڭ جيىرما ءبىرىنشى جىلى تولاعاي تابىستارعا، جاڭا جەتىستىكتەرگە تولى بولادى دەپ سەنەمىن.

وسى ءبىر ەرەكشە ساتتە ءبارىمىزدىڭ ءارمان-ۇمىتىمىز ءبىر ارناعا توعىسادى. بۇل – مەرەكەلىك اقجارما تىلەك. بوساعادان ەنىپ كەلە جاتقان جىل بەرەكەلى بولسىن! تەك جاقسىلىق پەن قۋانىش اكەلسىن! ءاربىر شاڭىراققا، ءاربىر وتباسىنا اماندىق، باقىت، ىرىس تىلەيمىن! وتانىمىز وركەندەي بەرسىن!

جاڭا جىل قۇتتى بولسىن، اعايىن!" دەدى پرەزيدەنت بەينەۇندەۋدە.