«انىق بۋحگالتەريانى ەنگىزۋ جوباسىنىڭ ماقساتى ءبىلىم بەرۋ سالاسىن قارجىلاندىرۋدىڭ اشىقتىعىن، ايقىندىعىن جانە تيىمدىلىگىن قامتاماسىز ەتۋ بولىپ تابىلادى»، – دەپ ءتۇسىندىردى ق ر ءبىلىم جانە عىلىم ءمينيسترى اسحات ايماعامبەتوۆ.
بۋحگالتەريانى، ەسەپكە الۋدى، كادر جۇمىسىن جانە شىعىستاردى جوسپارلاۋدى اۆتوماتتاندىرۋ سىبايلاس جەمقورلىق تاۋەكەلدەرىن تومەندەتۋگە جانە شىعىستاردىڭ تيىمدىلىگىن ارتتىرۋعا مۇمكىندىك بەرەدى. ءبىلىم جانە عىلىم مينيسترلىگى بۋحگالتەريانى، ەسەپكە الۋ مەن كادرلاردى جان باسىنا قارجىلاندىرۋ جانە سيفرلاندىرۋ تەتىكتەرىن ەنگىزۋگە باستاماشىلىق جاسادى. بۇل جوبا نۇر-سۇلتان قالاسىنىڭ جانە پاۆلودار وبلىسىنىڭ ءبىلىم بەرۋ ۇيىمدارىندا سىناقتان ويداعىداي ءوتتى. جۇرگىزىلگەن پيلوتتىق جوبانىڭ ناتيجەسىندە ەلوردادا عانا بىرنەشە ملرد تەڭگە ۇنەمدەلىپ، ءبىلىم بەرۋ ۇيىمدارىنىڭ قارجى قىزمەتىنىڭ جۇمىسى جاقساردى. بۋحگالتەرلىك جانە سالىقتىق ەسەپكە الۋ كەزىندە بۇزۋشىلىقتار سانى ەداۋىر قىسقاردى، باقىلانبايتىن شىعىستار تاۋەكەلى بارىنشا ازايتىلدى.
جوبا بىزگە جالاقىنى دۇرىس ەسەپتەمەۋ، قارجىلىق بۇزۋشىلىقتار، جوسپارلاۋ، قارجىلاندىرۋ كەزىندەگى سۋبەكتيۆيزم سياقتى پروبلەمالاردى شەشۋگە كومەكتەسەدى جانە ءبىلىم بەرۋ مەكەمەلەرىنىڭ قارجىلىق جاعدايىنا جەدەل مونيتورينگ جۇرگىزۋدى قامتاماسىز ەتەدى.
مينيستر تۇسىندىرگەندەي، بۋحگالتەريانىڭ وزىنەن باسقا بيۋدجەتتى جوسپارلاۋ، مەملەكەتتىك ساتىپ الۋ، تاريفتەۋ جانە ەسەپكە الۋ پروسەستەرى دە اۆتوماتتاندىرىلادى. بۇل جوبا – ءبىلىم بەرۋگە جۇمسالاتىن قاراجاتتى پايدالانۋدىڭ اشىقتىعى مەن تيىمدىلىگىن باقىلاۋعا جاسالعان تاعى ءبىر قادام.
دەرەككوز: ءبىلىم بەرۋ جانە عىلىم مينيسترلىگىنىڭ بلوگى
پىكىر قالدىرۋ