مەملەكەت باسشىسى باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى سەرىك ءجۇمانعاريندى قابىلدادى. بۇل تۋرالى akorda.kz سايتى حابارلادى.
قاسىم-جومارت توقايەۆقا ەلدەگى باسەكەلەستىكتى دامىتۋدىڭ نەگىزگى باعىتتارى مەن اتالعان سالانى جەتىلدىرۋ جونىندە بەرىلگەن تاپسىرمالاردىڭ ورىندالۋ بارىسى تۋرالى ەسەپ بەرىلدى.
سەرىك جۇمانعارين پرەزيدەنتكە ءارتۇرلى نارىقتاردا باسەكەلەستىكتى دامىتۋعا كەدەرگى بولىپ وتىرعان ماسەلەلەر تۋرالى جانە باسەكەلەستىكتى دامىتۋ جونىندەگى ۇلتتىق جوبانىڭ ازىرلەنىپ جاتقانىن ايتتى.
قاسىم-جومارت توقايەۆقا زاڭناماداعى كەيبىر وزگەرىستەر، اتاپ ايتقاندا، مەملەكەت يەلىگىنەن شىعارۋ ساياساتىنا قاتىستى، مەملەكەتتىك جانە جەكەمەنشىك وپەراتورلاردى رەتتەۋ تەتىكتەرى، سونداي-اق، باسەكەلەستىك سالاسىنىڭ دامۋىنا نورماتيۆتىك-قۇقىقتىق اكتىلەردىڭ اسەرىن باعالاۋدى ەنگىزۋ جايىندا باياندالدى.
سالا ماماندارىنىڭ كاسىبي الەۋەتىن كوتەرۋ شەڭبەرىندە پرەزيدەنتكە كازگيۋۋ ۋنيۆەرسيتەتىنىڭ بازاسىندا «باسەكەلەستىك قۇقىق» ماماندىعى بويىنشا ماگيستراتۋرانىڭ ءبىلىم بەرۋ باعدارلاماسىنىڭ اشىلعانى جونىندە ايتىلدى.
سونىمەن قاتار، سەرىك جۇمانعارين مەملەكەت باسشىسىنا بيىلعى جىلدان باستاپ ەلىمىزدە اشىق بيرجالىق ساۋدا باستالاتىنىن، ونىڭ مۇناي ونىمدەرى، كومىر، ەلەكتر ەنەرگياسى، سۇيىتىلعان گاز جانە اوك ونىمدەرىن قامتيتىنىن حابارلادى.
بۇدان بولەك پرەزيدەنتتىڭ تاپسىرماسى بويىنشا فارماسيەۆتيكا، گاز سالالارىندا جۇرگىزىلىپ جاتقان تەكسەرۋلەردىڭ بارىسى، سونداي-اق، دارى-دارمەك باعاسىن رەتتەۋدىڭ جاڭا تاسىلدەرى تۋرالى جان-جاقتى باياندالدى.
كەزدەسۋ سوڭىندا قاسىم-جومارت توقايەۆ اگەنتتىك ءتوراعاسىنا بيرجالىق ساۋدانى دامىتۋعا، ۆەدومستۆو جۇرگىزىپ جاتقان تەكسەرۋلەرگە، سونداي-اق، شاعىن جانە ورتا بيزنەستى قورعاۋ جانە دامىتۋعا بايلانىستى ءبىرقاتار تاپسىرما بەردى.
پىكىر قالدىرۋ