پرەزيدەنت  قاسىم-جومارت توقايەۆ ءبىلىم بەرۋ تۋرالى زاڭعا وزگەرىستەر ەنگىزگەنىن حابارلادى. 

"قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" قازاقستان رەسپۋبليكاسىنىڭ زاڭىنا قول قويدى"، دەلىنگەن رەسمي سايت حابارلاماسىندا.

زاڭنىڭ ءماتىنى باسپاسوزدە جاريالانادى.

ۋچەت.kz پورتالىنىڭ مالىمەتىنە سۇيەنسەك، 29 جەلتوقساندا زاڭدا "قاشىقتىقتان ءبىلىم بەرۋ" ۇعىمى بەكىتىلگەن.

– جاڭا كەزەڭ ءبىلىم بەرۋ جۇيەسىنە جاڭا تالاپتار قويىلادى. (...) الەمدى ءدۇر سىلكىندىرگەن پاندەميا ءبىزدىڭ ەلىمىزدى دە اينالىپ وتپەدى. بۇل ءبىرىنشى كەزەكتە ءبىلىم بەرۋ جانە دەنساۋلىق ساقتاۋ سەكتورلارىنا قاتىستى بولدى. وقۋ پروسەسى قيىندىقتارعا قاراماستان ۇزدىكسىز ءجۇرىپ جاتقانىن بىلەسىز. وسى ۋاقىتقا دەيىن زاڭنامادا قاشىقتىقتان ءبىلىم بەرۋدىڭ ءبىرىڭعاي تۇجىرىمداماسى بولعان جوق. ەندى مۇندا "قاشىقتىقتان وقىتۋ" ۇعىمى ناقتىلانىپ، ونى وتكىزۋ ءتارتىبى انىقتالدى، – دەپ ءتۇسىندىردى سەناتور باقىتجان جۇماعۇلوۆ 29 جەلتوقساندا زاڭ جوباسىن تانىستىرا وتىرىپ.

سونداي-اق تۇزەتۋلەرمەن قاتار وقۋلىقتار ساپاسىنىڭ پروبلەماسىن "تۇبەگەيلى شەشۋ" كوزدەلەدى.

– ول ءۇشىن ءبىلىم بەرۋ سالاسىنداعى ۋاكىلەتتى ورگانعا ۇلگىلىك جوسپارلاردى، باعدارلامالاردى، وقۋلىقتاردى جانە وقۋ ادىستەمەلىك كەشەندەر مەن تەستىلەۋدىڭ ساراپتاماسىن بەرۋ قاجەت. مونيتورينگتىڭ ارنايى ەرەجەلەرىن ازىرلەۋ جانە بەكىتۋ تاپسىرىلدى. بۇل ساپالى وقۋلىقتار دايىنداۋعا جانە اۆتورلاردىڭ جاۋاپكەرشىلىگىن ارتتىرۋعا مۇمكىندىك بەرەدى، – دەپ ءتۇسىندىردى سەناتور.

 سونىمەن قاتار، ستۋدەنتتەردىڭ ءبىلىم جەتىستىكتەرىن انىقتاۋ ءۇشىن باقىلاۋ تۋرالى ەرەجە ەنگىزىلەدى، بۇل وقۋشىلاردىڭ نەگىزگى ءبىلىم دەڭگەيىن انىقتايدى.

– قازىرگى ۋاقىتتا كاسىپكەرلىك كودەكسىنە سايكەس ءتۇرلى تەكسەرۋلەرگە تىيىم سالىنعان. وسىعان بايلانىستى ءبىلىم بەرۋ ساپاسىن باقىلاۋ ماقساتىندا بارلىق مەكتەپكە دەيىنگى ۇيىمداردى، مەكتەپتەردى، كوللەدجدەردى بەس جىلدا ءبىر رەت مەملەكەتتىك اتتەستاتتاۋدىڭ زاڭنامالىق تەتىگى ازىرلەندى. ءبىلىم بەرۋ ساپاسىن مەملەكەتتىڭ نازارىندا ۇستاۋ-قوعامدىق-ساياسي ماڭىزى بار ماڭىزدى قادام دەپ سانايمىن، – دەپ اتاپ ءوتتى جۇماعۇلوۆ.