بەيسەنبىدە دجەفف بەزوستى باسىپ وزىپ، الەمدەگى ەڭ باي ادام اتانعان يلون ماسك ءوزىنىڭ بارلىق مۇلكىن ساتاتىنىن ايتتى. ويتكەنى ميللياردەر مارستا قالا قۇرۋدى قارجىلاندىرۋ ءۇشىن مۇمكىندىگىنشە كوپ كاپيتالعا يە بولعىسى كەلەدى. ماسك بۇل تۋرالى Axel Springer كومپانياسىنىڭ باس ديرەكتورى ماتياس دوپفنەرگە بەرگەن سۇحباتىندا ايتتى. 

– مەن سونىمەن قاتار بۇل ماسەلەگە بايىپتى ەكەنىمدى بىلدىرۋگە تىرىسامىن. بۇل اقشالار جەكە تۇتىنۋىم ءۇشىن ەمەس. ادامدار ماعان شابۋىلداپ، "و، بۇنىڭ ءبارى وعان تيەسىلى" دەيدى.  جارايدى، ەندى مەندە ولار جوق، – دەدى ماسك.

بەيسەنبىدە بايلىعى 188 ملرد دوللارعا باعالانىپ، جاھانداعى ەڭ باي ادام بولعان يلون ماسكتىڭ ۇلكەن جوسپارلارى بار. Tesla جانە SpaceX كومپانياسىنىڭ باس ديرەكتورى مارس ميسسياسىنا مۇمكىندىگىنشە كوپ قاراجات بولۋگە تىرىسادى. سول ءۇشىن ءوزىنىڭ ماتەريالدىق بايلىعىنىڭ كوپ بولىگىن ساتپاق

– شىن مانىندە، مەندە اقشالاي بايلىق جوق، تەك كومپانيالارداعى اكسيالاردان باسقا، – دەدى ماسك.

ونىڭ سوزىنشە، جۇمىسى قاربالاس بولسا، وعان زاۋىتتا نەمەسە كەڭسەدە ۇيىقتاعان ۇنايدى. "ال، بالالارىم بولعان كەزدە ارينە، ماعان ورىن كەرەك. سوندىقتان مەن تەك ورىن نەمەسە باسقا نارسەنى جالعا الامىن" دەدى تەح-ميللياردەر.

بىلتىر مامىردا ماسك ءوزىنىڭ بارلىق دەرلىك زاتتارىن ساتۋدى جوسپارلاپ وتىرعانىن جانە ءۇيى بولمايتىنىن مالىمدەگەن. سودان بەرى كاسىپكەر جىلجىمايتىن مۇلىك پورتفەلىندەگى بىرنەشە ءۇيدى ساتتى. ول ۇيلەردىڭ قۇنى ءبىر كەزدەرى 100 ميلليون دوللاردان اسقان بولاتىن.

2020 جىلى ماسك ميلليونداعان دوللار تۇراتىن مۇلىكتەرىن ساتتى. ونىڭ ىشىندە لوس-اندجەلەستىڭ Bel-Air ماڭىنداعى ءۇش ءۇي جانە بۇرىن اكتەر دجين ۋايلدەرگە تيەسىلى جىلجىمايتىن مۇلىك تە بار. ماسكتىڭ كاليفورنياداعى جىلجىمايتىن مۇلىكتەرىن ساتىپ، تەحاسقا كوشكەنىن كەيبىرەۋلەر "سالىق تولەمەۋدىڭ جولى" دەپ بولجايدى. دەگەنمەن ميللياردەر Insider-گە بايلىق جيناۋىنىڭ باستى سەبەبى ماتەريالدىق بايلىق ءۇشىن ەمەس، مارستاعى كولونيانى قارجىلاندىرۋ ءۇشىن ەكەنىن ايتتى.

– مەنىڭ ويىمشا، ادامزات ءۇشىن عارىشتىق وركەنيەت پەن كوپعالامشارلى تۇرگە اينالۋ وتە ماڭىزدى. ال مارستا قالا سالۋ ءۇشىن كوپتەگەن رەسۋرس قاجەت. مەن مارستاعى قالاعا مۇمكىندىگىنشە بارلىق كۇشىمدى سالعىم كەلەدى. بۇل تەك ۇلكەن كاپيتالدى بىلدىرەدى، –دەدى ماسك.

ونىڭ ويىنشا، ماتەريالدىق يگىلىكتەرىمەن قوشتاسۋ – مارسقا بارۋعا بەل بۋعانىن بىلدىرەدى.

تەسلانىڭ اكسياسى قىمباتتاپ، بەيسەنبى كۇنى ماسكتىڭ بايلىعى دجەفف بەزوستان اسىپ كەتكەن كەزدە، باس ديرەكتور ءوزىنىڭ Twitter پروفيلىندەگى جازبانى 2018 جىلعى تۆيتكە اۋىستىردى. وندا ول ءوز بايلىعىنىڭ جارتىسىن جۇمساپ، مارستا قالا قۇرۋعا ۋادە بەرگەن. "دينوزاۆرلار سياقتى مەتەور سوققىسىنىڭ سەبەبىنەن جويىلىپ كەتپەس ءۇشىن نەمەسە ءۇشىنشى دۇنيەجۇزىلىك سوعىس سەبەبىنەن ءوزىمىزدى قۇرتىپ الساق، تىرشىلىكتىڭ جالعاسۋىن (بارلىق تىرشىلىكتىڭ) قامتاماسىز ەتۋ ءۇشىن، بايلىعىمنىڭ جارتىسىن مارستا قالا سالۋعا ارنايمىن" دەپ جازعان يلون ماسك.

ال بايلىعىنىڭ قالعان جارتىسى جەر شارىنداعى پروبلەملاردى شەشۋگە ارنالاتىنىن ايتتى.

يلون ماسكتىڭ SpaceX كومپانياسى Starship دەپ اتالاتىن 387 فۋتتىق زىمىراننىڭ ۇشەۋىن ۇشىرۋدى جوسپارلاپ وتىر. كومپانيا عارىشتى باعىندىرۋدى جىلدامداتۋعا تىرىسۋدا. ميللياردەر 2050 جىلعا قاراي مارسقا 1 ميلليون ادامدى قونىستاندىرماق. ولاردى قىزىل عالامشارعا اپارۋ ءۇشىن 1000 Starship عارىش كەمەسىنىڭ پاركىن قۇرۋدى جوسپارلاپ وتىرعانىن ايتتى.

مارسقا بارۋ كوپتەگەن ادامعا وتە قىمبات بولماس ءۇشىن، ماسك ول جەردە  "اقشاسى جوقتارعا نەسيە" بەرۋدى كوزدەيتىنىن جانە قىزىل عالامشاردا كولونيزاتورلارعا جۇمىس ورنىن اشاتىنىن ايتتى. ونىڭ سوزىنشە، مارسقا نەسيەمەن بارعاندار قىزىل عالامشاردا جۇمىس ىستەپ، كرەديتىن قايتارادى. ال كەيبىر سىنشىلار ماسكتىڭ جوسپارلارى "ينتەنسيۆتى سەرۆيتۋتتىڭ پلانەتاارالىق تۇرىنە ۇقسايدى" دەيدى." (ينتەنسيۆتى سەرۆيتۋت – 1600 جىلدارى امەريكا قۇراما شتاتتارىندا كەڭىنەن تانىمال كەلىسىمشارت. بۇل كەلىسىمشارت بويىنشا ادامدار اقشا ءۇشىن ەمەس، امەريكاعا كىرۋ ءۇشىن جۇمىس ىستەگەن.)