سەنات ءتوراعاسى ماۋلەن اشىمبايەۆ بۇگىن ءوتىپ جاتقان سايلاۋدا داۋىس بەردى. بۇل تۋرالى ول ءوزىنىڭ الەۋمەتتىك جەلىدەگى پاراقشاسىندا حابارلادى.
– بۇگىن ەل دامۋىنداعى ماڭىزدى كۇندەردىڭ ءبىرى. اسىرەسە، قازىرگىدەي كۇردەلى كەزەڭدە بۇل سايلاۋدىڭ بۇرىنعىلاردان ءجونى بولەك. مەملەكەت باسشىسىنىڭ باستاماسىمەن قولعا الىنعان ءبىرقاتار ساياسي رەفورمالاردىڭ العاش رەت وسى ناۋقاندا ىسكە اسىرىلىپ جاتقانىن دا جاقسى بىلەمىز. سونىڭ ىشىندە پارتيالىق تىزىمدەرگە ايەلدەر مەن جاستارعا ارنايى 30 پايىزدىق كۆوتانىڭ ەنگىزىلۋىن، پارلامەنتتىك وپپوزيسيا ينستيتۋتىنىڭ زاڭمەن بەكىتىلۋىن جانە ساياسي پارتيالاردى تىركەۋ ءتارتىبىنىڭ جەڭىلدەتىلۋىن ەرەكشە اتاپ وتۋگە بولادى.
جالپى، بۇگىنگى سايلاۋ پرەزيدەنتىمىزدىڭ الەۋمەتتىك-ەكونوميكالىق باستامالارىن تابىستى جۇزەگە اسىرۋعا جانە قازاقستاننىڭ وسىپ-وركەندەۋىنە تىڭ سەرپىن بەرەدى دەپ سەنەمىز. ول ءۇشىن ازاماتتارىمىز داۋىس بەرۋدە بەلسەندىلىك تانىتۋى قاجەت. مەن دە بۇگىن سايلاۋ ۋچاسكەسىنە بارىپ، ءوز تاڭداۋىمدى جاسادىم، - دەيدى ول.
ول ءوز سوزىندە داۋىس بەرۋ – ءارقايسىمىزدىڭ ازاماتتىق قۇقىعىمىز جانە بورىشىمىز ەكەنىن اتاپ ءوتتى.
– بۇل – ءار ازامات ءۇشىن مەملەكەتتىڭ دامۋىنا ىقپال ەتەتىن مۇمكىندىك. سول سەبەپتى، ەلىمىزدەگى بارشا سايلاۋشىلاردى وسى مۇمكىندىكتى جىبەرمەي، ساياسي ناۋقاننان قالىس قالماۋعا شاقىرامىن، – دەپ جازدى اشىمبايەۆ.
پىكىر قالدىرۋ