ءبىلىم جانە عىلىم مينيسترلىگى اۋىلدىق ەلدى-مەكەندەردەگى كوللەدج ستۋدەنتتەرى ءداستۇرلى فورماتتا، ال جوعارى وقۋ ورىندارىندا وقۋ پروسەسى ارالاس فورماتتا وتەتىنىن مالىمدەدى. 

مينيسترلىك رەسمي سايتىنىڭ حابارلاۋىنشا، ەكىنشى سەمەستردەن باستاپ قازاقستاندىق كوللەدجدەردە وقۋ پروسەسى ءداستۇرلى، قاشىقتان جانە ارالاس فورماتتا جالعاسادى.

ال اۋىلدىق جەرلەردە جانە شاعىن قالالاردا ورنالاسقان 97 كوللەدج ءوز ستۋدەنتتەرى ءۇشىن وقۋدى ءداستۇرلى فورماتتا ۇيىمداستىرادى. سونداي-اق ق ر ءىىم مەن ق ر قم جانىنداعى 14 كوللەدجدىڭ ستۋدەنتتەرى وقۋ ورىندارىندا وقيدى.

"قالعان كوللەدجدەردە ءبىرىنشى كۋرس ستۋدەنتتەرى ءۇشىن، اتاپ ايتساق ستۋدەنتتەرىنىڭ جالپى سانىنىڭ شامامەن 31%-ى ءۇشىن وقىتۋ ارالاس فورماتتا ۇيىمداستىرىلادى.

ءبىرىنشى كۋرس ستۋدەنتتەرى ءۇشىن بارلىق سانيتارلىق-ەپيدەميولوگيالىق تالاپتاردى ساقتاي وتىرىپ، وقىتۋ پاندەرىنىڭ 70%-ى ءداستۇرلى فورماتتا جانە 30%-ى قاشىقتان وتكىزىلەدى. تجكب ۇيىمى وقۋ جۇمىس جوسپارلارىنا سايكەس شتاتتىق جانە قاشىقتان وقىتۋ فورماتتارىندا وقىتۋدى وتكىزۋ ءۇشىن پاندەر تىزبەسىن دەربەس ايقىندايتىن بولادى.

اۋديتوريالىق ساباقتاردىڭ ۇزاقتىعى 45 مينۋتتان اسپايدى، كوللەدج اكىمشىلىگى يكەمدى كەستە قۇرادى. كابينەتتەردە ۇزىلىستەر اراسىندا جانە ساباقتان سوڭ سانيتارلىق تازالاۋ جۇمىستارى جۇرگىزىلەدى.

2-4 كۋرس ستۋدەنتتەرى ارالاس فورماتتا وقيدى. تەحنيكالىق، تەحنولوگيالىق، اگرارلىق باعىتتار بويىنشا وقيتىن ستۋدەنتتەر ءۇشىن ساباقتار قاشىقتان، زەرتحانالىق جانە پراكتيكالىق ساباقتار، وندىرىستىك وقىتۋ جانە كاسىپتىك پراكتيكا ءداستۇرلى فورماتتا ۇيىمداستىرىلاتىن بولادى. قورىتىندى اتتەستاتتاۋ دا شتاتتىق رەجيمدە وتەدى" دەلىنگەن مينيسترلىك تاراتقان حابارلامادا.

سونداي-اق پەداگوگيكالىق، ەكونوميكالىق، IT، الەۋمەتتىك جانە گۋمانيتارلىق ماماندىقتار بويىنشا 2-4 كۋرس ستۋدەنتتەرى وقۋدى قاشىقتان وقۋ فورماتىندا جالعاستىرادى.