بۇگىن پارلامەنت ءماجىلىسىنىڭ جالپى وتىرىسىندا ۇكىمەت باسشىسى لاۋازىمىنا اسقار مامين بەكىتىلدى. 

اسقار ءماميندى وسى لاۋازىمعا پرەزيدەنت قاسىم-جومارت توقايەۆ ۇسىنعان بولاتىن.

اسقار ۇزاقباي ۇلى مامين 1965 جىلى سەلينوگراد قالاسىندا دۇنيەگە كەلگەن.

سەلينوگراد ينجەنەر قۇرىلىسى ينستيتۋتىن، گ. ۆ. پلەحانوۆ اتىنداعى رەسەي ەكونوميكالىق اكادەمياسىن ينجەنەر-قۇرىلىسشى، ەكونوميست ماماندىعى بويىنشا ءتامامداعان.

ەڭبەك جولىن «سەلينتياجستروي» ترەسىندە مونتاجداۋشى بولىپ باستاعان. 1996–2008 جىلدار ارالىعىندا استانا قالاسى اكىمىنىڭ ءبىرىنشى ورىنباسارى، كولىك جانە كوممۋنيكاسيالار ۆيسە-مينيسترى، يندۋستريا جانە ساۋدا ءبىرىنشى ۆيسە-مينيسترى، قازاقستان رەسپۋبليكاسى كولىك جانە كوممۋنيكاسيالار ءمينيسترى، استانا قالاسىنىڭ اكىمى قىزمەتتەرىن اتقارعان.

2008 جىلعى ساۋىردەن باستاپ – «قازاقستان تەمىر جولى» ۇلتتىق كومپانياسى» اكسيونەرلىك قوعامىنىڭ پرەزيدەنتى. 

2016 جىلعى 9 قىركۇيەكتەن باستاپ – ق ر پرەمەر-مينيسترىنىڭ ءبىرىنشى ورىنباسارى. 2019 جىلعى 25 اقپاننان باستاپ قازاقستان رەسپۋبليكاسى پرەزيدەنتىنىڭ جارلىعىمەن ق ر پرەمەر-مينيسترى بولىپ تاعايىندالدى.

«ەرەن ەڭبەگى ءۇشىن» مەدالىمەن (1998)، «قۇرمەت» وردەنىمەن (2006)، ەكىنشى دارەجەلى «بارىس» وردەنىمەن (2011)، اۋليە كنياز ماسكەۋلىك ءدانييلدىڭ ءۇشىنشى دەڭگەيلى وردەنىمەن (2010)، فرانسۋز رەسپۋبليكاسىنىڭ قۇرمەتتى لەگيونى (2013) جانە لاتۆيا رەسپۋبليكاسىنىڭ «تانىم كرەستى» ەكىنشى دەڭگەيلى وردەنىمەن (2013)، يسپانيا كورولدىگىنىڭ «ازاماتتىق ەڭبەگى ءۇشىن» ءبىرىنشى دەڭگەيلى وردەنىمەن (2014) ماراپاتتالعان.

استانا قالاسىنىڭ قۇرمەتتى ازاماتى (2011)، قۇرمەتتى تەمىرجولشى (2012)، قازاقستاننىڭ قۇرمەتتى قۇرىلىسشىسى (2013).